O'tgan asrning o'rtalaridan boshlab Shimoliy Amerikada mada-niy relyativizm va qayta
tiklangan evolyutsionizmning yangi turlari (neoevolyutsionizm), tarixiylikka ko'r-ko'rona ravishda
yondashish va hatto taraqqiyparvar olimlarning g'oyalariga yaqinlashish an'anasi kuchayadi. Atoqli
rus etnologi Yu.P. Averkiyeva «1960-yillarda anti-evolyutsionizm urfdan chiqib, ilgarigi
evolyutsionizm tanqidchilari endi o'zlari doim evolyutsionist bo'lganliklarini aytib, faqat o'tgan asr
evolyutsionizmning asossiz amaliy aqidalarini tanqid qilib kelganliklariga
ilmiy jamoatchilikni
ishontirishga intiladilar» — deb yozadi. AQSHda 1963 va 1964-yillarda L. Morganning «Qadimgi
jamiyat» asari yangi nashrda chiqishi bunga dalildir. Funksionalistik, diffuzionistik va boshqa eski
«izm»larning qurama g'o-yalaridan paydo bo'lgan neoevolyutsionizm asli yangi zamon etnologiyasi
nazariyasining oxirgi so'zidir.
Madaniy relyativizmning boshqa eng yirik namoyandasi antropolog Melvill Xerskovits har
bir xalq madaniyatini nisbiy, mustaqil deb hisoblab, umumiy, masalan, Yevropa-Amerika
qiymatlilik sistemasini, o'ziga xos madaniy xususiyatlarini inkor qiladi. Ayrim madaniyatning
nisbiyligini tan olish bilan birga insoniyatga xos umumaxloq mezonlari ham nisbiy (relyativ)
xarakterga ega, xalqlar madaniyati orasidagi ba'zi o'xshashliklar ham mustaqil, yaxlit insoniyat
taraqqiyoti yo'q, deb da'vo qiladi. Uning ta'rificha, hozirgi Yevropa-Amerika madaniyatining asosiy
belgisi texnologiya, o'rta asr Yevropasida supernaturalizm, ya'ni diniy mafkuraning hukmronligi,
hozirgi melaneziyaliklarda ijtimoiy «prestij», Hindistonda sigirga sig'inish
kabilar mazkur
xalqlarning madaniy xususiyatlarini ifodalaydi.
Neoevolyutsionizm g'oyalari esa Michigan universitetining professori, atoqli etnolog Lesli
Uayt («Madaniyat evolyutsiyasi», «Madaniyat to'g'risidagi fan» asarlari va hokazo), uning shogirdi
va izdoshi Marshall Salins, mashhur etnolog va arxeolog Julian Styuard asarlarida yorqin ifodasini
topgan. Masalan, Lesli Uayt ilmiy dunyoqarashidagi o'rta tushuncha - madaniyat aslida simvol
(belgi)lardan tashkil topgan, degan tushunchadir. Madaniyat evolyutsiyasi, Uayt fikricha, asosan,
texnologik taraqqiyotdan iborat bo'lib, u evolyutsiyaning «sotsiologik», «ideologik» va
«sentimental» kabi o'zaro bog'liq muhim qismlariga kuchli ta'sir o'tkazadi. Ijtimoiy taraqqiyotning
dastlabki shakli oila, kishilik jamiyati va madaniyat evolyutsiyasining negizi mulk hisoblanadi.
Uayt o'zining juda ko'p asarlarida «antropolog» (etnolog)larni akademik tadqiqot qobig'i bilan
cheklanmay, katta nazariy va hayot o'rtaga qo'ygan amaliy masalalarni dadil hal qilishga chaqiradi.
Styuard ham ko'p asarlarida evolyutsion g'oyani g'oyat xilma-xil madaniyatlar bilan, ijtimoiy hayot
shakllari bilan birma-bir moslashtirishga intiladi. Etnologning asosiy vazifasi, deydi u, faqat
madaniyatlarni izohlabgina qolmay, balki ularning taraqqiyot qonunlarini aniqlashdan, kishilarning
o'zaro munosabatlari va ularning tevarak-atrofidagi muhitni o'rganishdan ham iboratdir.
Hozirgi davrdagi Yevropa etnologiyasida eng asosiy o'rinni keng
tarqalgan strukturalizm
oqimi egallaydi. Juda ko'p original etnologik asarlari bilan tanilgan iste'dodli fransuz olimi Klod
Levi-Stross shu oqimning asoschilaridan biri hisoblanadi, AQSH va G'arbiy Yevropada uning
fikrlarini fan nazariyasi, deb tasdiqlashga intiladilar. Levi-Stross jamiyat to'g'risidagi Dyurkgeym
ta'limoti va formal lingvistika uslubini yaratgan Ferdinand de Sossyura g'oyalari ta'sirida
tilshunoslikdagi struktura uslub orqali ayrim madaniyatlarning tuzilishi (strkutrasi)ni simvollar
tizimi shaklida qaytadan tiklash mumkin, degan fikrni ilgari suradi. Uning ta'rificha, real yaxlit
borliq sifatida madaniyatni emas, balki uning strukturasidan sun'iy ravishda ajratib olingan ayrim
qismlarni, masalan,
qarindoshlik terminologiyasi, folklor, mifologiya, taom tayyorlash va
hokazolarni tadqiq qilish zarur, Levi-Stross asarlarining nomlari («Xom va pishirilgan», «Asaldan
kulga», «Qadah ko'tarish odatlarining kelib chiqishi», «Yalang'och kishi») fikrimizga dalil bo'la
oladi. Asosan, Janubiy Amerika hindilarini o'rgangan Levi-Stross maishiy turmush va
madaniyatning turli tomonlarini o'ziga xos qonuniyatga ega bo'lgan yopiq sistema shaklida
ta'riflaydi. Demak, strukturalizm nazariyasining negizida qandaydir tarixiy tuzumdan tashqari,
sabab-natija aloqalariga ega bo'lmagan abadiy struktura mavjud va u inson tafakkuri hali bexabar
kishi ongi mahsulidir, degan tasavvur yotadi.
Levi-Stross konsepsiyasida jamiyatdan sun'iy ravishda ajratilgan hodisalarining ayrim
qismlarini o'rganish asos bo'lsa, juda ko'p iste'dodli olimlardan iborat «ingliz strukturalistlari» real
konkret tarixiy birikmalar (qabila, xalq, davlat)ning ayrim strukturalarini tadqiq qiladilar. Mazkur
nazariya vakillaridan atoqli
afrikashunos Evans-Pritchard, Okeaniya orollari etnografiyasini
o'rganishda mashhur bo'lgan Daymond Fyors, Janubiy Afrikada tug'ilgan etnograf Meyer Fortes va
uning hamkasbi Maks Glukmen tadqiqotlari e'tiborga molikdir.
Yevropa etnologiyasida o'tgan asrda paydo bo'lgan «o'lkashunoslik» tendensiyasi so'nggi
yillarda ancha o'sdi. Natijada o'z xalqini o'rganish, turli muzeylar yaratish, ochiq etnografik
muzeylarni tiklash, muayyan tadqiqotlar o'tkazish, ayniqsa kuchaydi. Hozir Yevropa va AQSHda
juda ko'p yuqori malakali etnologlar paydo bo'lgan. Faqat AQSHning o'zida taxminan uch mingga
yaqin etnolog mavjud. Mamlakatning deyarli hamma universitetlarida etnologiya kursi o'qiladi va
etnologik ilmiy tadqiqotlar o'tkaziladi. Ilmiy tadqiqotlar o'tkazishda ko'p muzeylar qatnashmoqda.
Maxsus etnologik jamiyatlarning faoliyati nashr etilish («Amerika etno-tarix jamiyati» kabilar),
turli jurnal va to'plamlar etnologiya faniga qiziqish katta ekanligidan dalolat beradi. Yevropada
o'lkashunoslikning o'sishi natijasida o'z xalqining maishiy turmushi, moddiy va ma'naviy
madaniyatini targ'ib qilish kuchayib bormoqda. Bu ishda maxsus qishloq tarzidagi ochiq joylarda
tiklangan etnografik muzeylar muhim rol o'ynamoqda.
Etnologiya fani qator Yevropa mamlakatlarida yangi ilg'or g'oyalar tufayli jiddiy ilm
sohasiga aylandi va tez sur'atlar bilan rivojlana boshladi. U g'oyaviy jihatdan obyektiv metodga
asoslangan holda etnogenez va etnik tarix, ibtidoiy jamiyat va sinflarning paydo bo'lishi, an'anaviy
moddiy va ma'naviy madaniyat, hozirgi etnik jarayon va ijtimoiy tuzum
kabi yirik muammolarni
keng miqyosda tadqiq qilishga kirishgan. Etnologik tadqiqotlar muntazam ravishda ko'p
mamlakatlarda boshqa yaqin fan sohalari, ayniqsa, sotsiologiya bilan hamkorlikda davlat siyosatiga
muvofiq ilmiy kadrlarni bir maqsad yo'lida katta muammolar tevaragiga jipslashtirgan holda olib
borilmoqda
4
.
Ayrim mamlakatlarda an'anaviy o'lkashunoslik doirasidan chiqilib, boshqa xalqlarni
o'rganishga o'tish jarayoni sezilmoqda. Xususan, Polshada «o'zbeklar» nomli monografiya
yaratilgan. Germaniyada etnologiya fani urushdan keyin bir qadar boshqacha sharoitda, ilmiy
kadrlarning bir qismi natsizm tuzumi davrida halok bo'lganligi, bir qismi chet ellarga qochganligi
tufayli fashistik maf-kura qoldiqlariga qarshi kurash olib borish barobarida rivojlandi. Barcha
Yevropa mamlakatlarida etnologik tadqiqotlar maxsus ilmiy tashkilotlar, universitetlar,
kafedralar
va muzeylar doirasida markazlashtirilgan.
Nazariy va amaliy masalalarni yangi muayyan pog'onaga ko'targan va jahon etnologiya
fanida o'ziga xos obro'ga ega bo'lgan mak-tabning paydo bo'lishi va shakllanishi ajoyib etnograf va
sharqshunos, atoqli olim S.P. Tolstov nomi bilan bevosita bog'liqdir. U etnografiya fanini jahon ilm
sahnasiga ko'tarib, uning ham nazariy, ham amaliy jihatdan yagona, izchil, barcha xalqlarni teng
tadqiq qiluvchi tarixiy fan ekanligini tasdiqlash yo'lida hormay-tolmay xizmat qildi. S.P. Tolstov
etnografiya fanining maqsadi va vazifalarini belgilab, bu fan xalqlar madaniyatining milliy va etnik
xususiyatlarini o'rgana-di, «turli tarixiy davrlarda paydo bo'lgan qatlamlarini» ochib beradi, deb
ta'kidlagan edi. Nihoyatda keng va teran bilim egasi bo'lgan S.P. Tolstov sharq xalqlari moddiy va
ma'naviy madaniyatini o'rganishdagi katta xizmatlari uchun O'zbekiston Respublikasi Fanlar
akademiyasining faxriy a'zosi qilib saylandi. Bu mashhur tadqiqotchi hozirgi etnik jarayonni
o'rganishga alohida e'tibor berar edi. Mazkur olijanob vazifani bajarishda bir qator iste'dodli etnolog
olimlar ham hormay-tolmay mehnat qilib, ancha yutuqlarga erishdilar. Bular ichida S.P. Tolstov
bilan birga ishlagan atoqli tadqiqotchilar: P.I. Kushner, I.I. Potexin, L.P. Potapov, G.F. Debes, M.O.
Kosven, S.A. Tokarev, M.G. Levin, N.N. Cheboksarov, B.O. Dolgix, D.A. Olderogge, N.A.
Kislyakov, T.A. Jdanno bo'ldilar. So'nggi yillarda yetishib chiqqan va etnografiya fanining rivojiga
salmoqli hissa qo'shgan tadqiqotchilar Yu.V. Bromley, Yu. P. Averkiyeva, S.I. Bruk, V.P.
Alekseyev, V.I. Kozlov, F.F. Its, G.E. Markov, B.A. Andrianov, V.K. Chistov, S.I. Vaynshteyn,
R.K. Kuzeyev, V.V.
Ginzburg, M.V. Kryukov, R.N. Ismagilova, Yu.V. Arutyunyan, Yu.I.
Semenov, N.A. Butinov, S. Kamolov, K. Shoni-yozovlar o'zlarining ajoyib asarlari bilan tanildilar.
Xullas, alohida qayd qilish lozimki, keyingi davrda ko'plab iste'dodli olimlar milliy etnologiya
4
Этнология. Учебник. Под.ред.Г.Е.Маркова и В.В.Пименова М.1994.С.60.