Oʼzbekiston Respublikasi Oliy va Oʼrta maxsus taʼlim vazirligi Namangan davlat universiteti, Yuridik fakulteti

Prezident maʼnaviy-maʼrifiy ishlar tizimini takomillashtirish toʼgʼrisidagi hujjatni imzoladi:
Prezident «Maʼnaviy-maʼrifiy ishlar tizimini tubdan takomillashtirish toʼgʼrisida"gi qarorni imzoladi. Barcha shahar va tumanlarda «Maʼnaviyat va maʼrifat maskani» yaratiladi, universitetlarda «Maʼnaviyatshunoslik», «Kasbiy maʼnaviyat» fanlari joriy etiladi.
2021 yil 26 mart kuni Prezident Shavkat Mirziyoev «Maʼnaviy-maʼrifiy ishlar tizimini tubdan takomillashtirish toʼgʼrisida"gi PQ-5040-son qarorni imzoladi.
Hujjatda aytilishicha, olib borilayotgan ishlarga qaramay, ijtimoiy, iqtisodiy va siyosiy sohalardagi yangilanishlar jarayonida maʼnaviy-maʼrifiy islohotlarning samaradorligiga toʼsiq boʼlayotgan bir qator tizimli muammolar saqlanib qolmoqda.
Maʼnaviy-maʼrifiy ishlar tizimini tubdan takomillashtirishning ustuvor yoʼnalishlari belgilandi:
• «Milliy tiklanishdan — milliy yuksalish sari» gʼoyasini keng targʼib etish orqali jamiyatda sogʼlom dunyoqarash va bunyodkorlikni umummilliy harakatga aylantirish;
• oila, taʼlim tashkilotlari va mahallalarda maʼnaviy tarbiyaning uzviyligini taʼminlash;
• targʼibot-tashviqot va tarbiya yoʼnalishidagi ishlarni ilmiy asosda tashkil etish, soha boʼyicha ilmiy va uslubiy tadqiqotlar samaradorligini oshirish, ijtimoiy-maʼnaviy muhit barqarorligini mustahkamlashga qaratilgan doimiy monitoring tizimini joriy qilish;
• el-yurt taqdiriga loqaydlik, mahalliychilik, urugʼ-aymoqchilik, korruptsiya, oilaviy qadriyatlarga bepisandlik va yoshlar tarbiyasiga masʼuliyatsizlik kabi illatlarga barham berishga qaratilgan kompleks chora-tadbirlarni amalga oshirish;
• aholining Internet jahon axborot tarmogʼidan foydalanish madaniyatini oshirish, gʼoyaviy va axborot xurujlariga qarshi mafkuraviy immunitetini kuchaytirish;
• madaniyat, adabiyot, kino, teatr, musiqa va sanʼatning barcha turlari, noshirlik-matbaa mahsulotlari, ommaviy axborot vositalarida maʼnaviy-axloqiy mezonlar, milliy va umuminsoniy qadriyatlarning ustuvorligiga erishish;
• geosiyosiy va mafkuraviy jarayonlarni muntazam oʼrganish, terrorizm, ekstremizm, aqidaparastlik, odam savdosi, narkobiznes va boshqa xatarli tahdidlarga qarshi samarali gʼoyaviy kurash olib borish hamda bu borada xalqaro hamkorlik aloqalarini rivojlantirish.
Respublikaning barcha viloyat va tumanlarida hududlarda barqaror ijtimoiy va maʼnaviy muhitni mustahkamlash, aholi ongida maʼnaviyatni oshirish maqsadida «Maʼnaviy va maʼrifat maskani» yaratiladi.
S huningdek, 2021−2022 oʼquv yilidan boshlab universitetlarda bakalavriat bosqichida «Maʼnaviyatshunoslik», magistratura bosqichida «Kasbiy maʼnaviyat» fanlari kiritiladi.