O‘zbekiston respublikasi oliy va o‘rta maxsus ta’lim vazirligi mirzo ulufbek nomidagi o‘zbekiston milliy universiteti

Suv resurslarining shakllanish qonuniyatlarini o‘rganish va ularni 
miqdoriy hamda sifat ko‘rsatkichlari bo‘yicha baholash
gidrologik 
jarayonlarni har tomonlama tadqiq etishga asoslanadi. Har bir ma’muriy 
hudud, har bir davlat, shu jumladan, O‘zbekiston yer usti va yer osti suv 
resurslarining hozirgi holatini, ularda kelajakda mumkin bo‘lgan miqdor va 
sifat o‘zgarishlarini baholash muhim ahamiyatga ega. Bu maqsadga 
erishish 
uchun 
Davlat 
suv 
kadastri 
(DSK) 
tizimini 
yanada 
takomillashtirish, gidrometeorologik kuzatish tarmoqlarini oqilona 
joylashtirish talab etiladi. Shuningdek, gidrologik axborotlarni to‘plash, 
ularni iste’molchilarning talablariga mos holda qayta ishlash va yetkazib 
berishning avtomatlashtirilgan tizimini tatbiq etish hamda bu tizimni 
takomillashtirish zarur. 
Xalq xo‘jaligi turli tarmoqlari talablarini qondirish bilan bog‘liq 
bo‘lgan gidrologik tadqiqotlar miqyosi ham sezilarli darajada ortib 
bormoqda. Masalan, hozirgi kunning o‘zida “Gidrologiya” fani sug‘orma 
dehqonchilik, gidroenergetika, suv transporti kabi tarmoqlarning 
rivojlanishi bilan bog‘liq bo‘lgan juda ko‘p ilmiy-amaliy masalalarning 
yechimiga sezilarli hissa qo‘shdi. Kelajakda yerlarni sug‘orishda suvning 
samarasiz yo‘qotilishini keskin kamaytirish, kichik daryolar va soylarni 
muhofaza qilish, ularda kichik gidrotexnik energiya manbalarini 
rivojlantirish kabi muammolar ham o‘z yechimini topishi lozim.
Ayni paytda, okeanlarning oziq-ovqat, kimyo, mineral, energetika va 
boshqa resurslaridan oqilona foydalanish bilan bog‘liq bo‘lgan masalalar 
ham o‘z tadqiqotchilarini kutmoqda. Bu yo‘nalishdagi me’yoriy 
chegaralarni belgilab berishda gidrologiya, aniqrog‘i, uning asosiy 
bo‘limlaridan biri hisoblangan “Okeanologiya” fanining o‘rni muhim 
ahamiyat kasb etadi. Yaqin kelajakda okean va dengizlarda kuzatiladigan 
suv qalqishi, to‘lqinlar, haroratlar farqi va boshqalar hisobiga ishlaydigan 
elektrostansiyalarni yaratish yo‘li bilan ulardagi energiya manbalaridan 
to‘g‘ridan-to‘g‘ri foydalanishni yanada keng rivojlantirish kutilmoqda. 
Demak, inson farovonligi yo‘lida okean va dengiz resurslaridan 
foydalanish ulkan imkoniyatlar manbaidir.