O‘zbekiston respublikasi oliy ta’lim, fan va innovatsiyalar vazirligi farg‘ona politexnika instituti «Menejment»

Yuridik shaxs deganda egaligida, xo‘jalik yuritishida yoki operativ boshqaruvida mol-mulkka ega bo‘lgan va o‘z majburiyatlari bo‘yicha shu mol-mulk bilan javob beradigan, shuningdek, mustaqil balansga ega bo‘lgan korxona, tashkilot, muassasalar hamda ularning mustaqil bo‘linmalari tushiniladi. Yuridik shaxsni tashkil etmasdan tadbirkorlik faoliyati bilan shug‘ullanuvchi jismoniy shaxslar yakka tartibdagi tadbirkorlar hisoblanadilar va davlat ro‘yxatidan o‘tgandan so‘ng tadbirkor maqomini oladilar.
Lekin shuni ham aytib o‘tish lozimki, O‘zbekiston qonunchiligiga muvofiq tadbirkorlik faoliyatining ayrim turlari bilan faqat yuridik shaxsni tashkil etgan holda shug‘ullanish mumkin va, demak, tadbir­korlik faoliyatining bunday turlari bilan yakka tartibda shug‘ullanish taqiqlangan. Ular Vazirlar Mahkamasining qarorlari bilan belgilangan.
O‘zbekiston mustaqillikka erishgandan so‘ng mulkchilikning butun dunyoda qabul qilingan shakllariga o‘tishni mo‘ljallab, qonun hujjatlarini ham shunga moslashtirib kelmoqda. SHunga muvofiq O‘zbekiston Respublikasi Fuqarolik kodeksida va boshqa qonun hujjatlarida mulk­chilikning ikki shakli ehtirof etilgan: xususiy mulk va ommaviy mulk.
Xususiy mulk egalari xususiy mulkdorlar bo‘lib, jismoniy shaxslar (fuqarolar) va yuridik shaxslar hisoblanadilar. Xususiy mulk shaxsiy ehtiyojni qondirishga mo‘ljallangan. U shaxsiy mulkdan farqli o‘laroq, yollanma mehnatni jalb qilib, tadbirkorlik bilan shug‘ullanishda ham ishlatiladi. Xususiy mulk tufayli xususiy tadbirkorlikka yo‘l ochiladi. Xususiy mulk - bu mulk egasi (mulkdor) o‘z mulkiga nisbatan o‘z huquqlarini xususiy tarzda, ya’ni boshqalarning roziligi yoki ruxsatini so‘rab o‘tirmay amalga oshiradigan mulkdir. Xususiy tadbirkorlik va jamoa tadbirkoriigining asosiy qismi ana shu mulkka asoslanadi.
Ommaviy mulk - bu davlat va boshqa ommaviy tuzilmalar mulki bo‘lib, ommaga tegishlidir. Davlat mulki haqiqatan ham xalqqa qarashli bo‘linmaydigan mol-mulkdan iborat. Unga yer, yer osti boyliklari, suv, o‘simlik va hayvonot dunyosi, havo bo‘shlig‘i va boshqalar, ya’ni iqtisodiy tizimning bevosita aholi foydasiga ishlaydigan va millatning ijodiy salohiyatini yaratadigan qismi kiradi. O‘zbekiston Respublikasi Fuqarolik kodeksiga muvofiq ommaviy mulk - bu respublika mulki va mahmuriy-hududiy tuzilmalar mulki (munitsipal mulk) dan iborat dav­lat mulkidir.