O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

Baydarka va kanoeda eshksk eshish taktikasi. Uzoq masofalarga eshkak eshishda taktikaning ahamiyati. Uzoq masofaga eshish bahslarida taktika muhim ahamiyat kasb etadi. Taktik reja avvaldan ishlab chiqilishi lozim, biroq poyga davomida unga o’zgartirish kiritish ehtimoli mavjud. Uzoq masofaga eshkak eshishda sportchidan temp va ritmni yaxshi sezishi talab etiladi. Poyga davomida temp va ritmni o’zgarishi charchoqni keltirib chiqaradi, shuning uchun holat taqozo etsa masofani bir maromda bosib o’tish kerak. Albatta g’alaba qozonish uchun masofaning ayrim bo’laklarida maksimal kuchlanish berish lozim. Uzoq masofada ishtirok etuvchi sportchilar bir qancha taktik variantlarga tayanadilar. Ba’zilari yetakchilik taktikasini ma’qul ko’radilar, ba’zilari yetakchi ortidan borish maqsadga muvofiq deb biladilar, bunda ular o’z kuchlarini nazorat qila oladilar va zarur bo’lganda oldinga chiqa olish imkoniga ega bo'ladilar.
Uzoq masofalarga eshkak eshishda yetakchilik va ta’qib qilish taktikalari mavjud. Yetakchi to’lqinida ketayotgan sportchi uchun har doim raqib bilan aloqa uzilishi havfi mavjud bo’ladi, sportchi uchun yagona to’g’ri taktika, bu raqib bilan aloqani uzmaslik, uning tezlanishlariga javob bera olish va finishda raqib irodasini buka olishdir.
Poyga yetakchisining taktikasi bunga umuman qarama qarshidir. Unga ta’qib qilayotgan sportchilardan holos bo’lish va butun masofa bo’yicha yetakchilik tempini ushlab turish zarur bo’ladi. Uning birinchi tezlanishi uzoqroq davom etishi kerak. Agar birinchi tezlanish ish bermasa, tempni o’zgartirib eshish taktikasini qo’llashi lozim. Bu taktika tezlanishlarni iloji boricha ko'proq amalga oshirganda samarali hisoblanadi.
G'olibdan qolib ketmaslik uchun katta musobaqalarda sportchilardan quyidagilar talab etiladi:
- startdan chiqishda iloji boricha yetakchilar guruhida uzoqroq qolish;
- g'olib to’lqinidan foydalangan holda o'z kuchini tejash;
- burilishni minimal radiusda amalga oshirish;
- raqib tezlanish olganda undan qolib ketmaslik;
- kuchning sarf bo’layotganligini raqibga ko’rsatmaslik;
- raqibni o'z taktikasiga bo’ysindirish;
- masofaning oxirida faqat o’z kuchiga ishonish.