O‘zbek poetikasi asoslari

Turkiy adabiyotda qit’aning ilk namunalari Nosiruddin Rabg‘uziyning “Qisasi Rabg‘uziy” asarida uchraydi. Adabiyotshunoslikda turkiy adabiyotdagi ilk qit'a Xorazmiy “Muhabbatnoma”sida uchraydi degan qarash bor edi. “Qisasi Rabg‘uziy”dagi she'riy parchalarning janr xususiyatlarini o‘rganish natijalari asarda qit'a janriga mos keluvchi she'rlar mavjudligini ko‘rsatdi).

Qit’a janrining rivojlanishida Alisher Navoiy ijodining alohida o‘rni bor. Shoirning “Xazoyin ul-maoniy” kulliyotida 210 ta (“G‘aroyib us-sig‘ar”, “Navodir ush-shabob” va “Favoyid ul-kibar”da 50 tadan, “Badoye’ ul-vasat”da 60 ta), “Devoni Foniy”da 64 ta, “Arbain”da 40 ta va boshqa nasriy asarlari tarkibida yana o‘nlab qit’alar mavjud. Kulliyotdagi qit'alarda ularning g‘oyasini ifodalovchi sarlavhalar qo‘yilgan.