Oxirgi yillarda molekula tuzilishini tadqiq qilishning ko‘p usullari yaratildi. Olingan natijalar esa umumiy xarakterga EGA. Ular asosida yaratilgan nazariyalar tajriba natijalarini sifat jihatdan tushuntiradi

Oxirgi yillarda molekula tuzilishini tadqiq qilishning ko‘p usullari yaratildi. Olingan natijalar esa umumiy xarakterga ega. Ular asosida yaratilgan nazariyalar tajriba natijalarini sifat jihatdan tushuntiradi. Miqdoriy tushuntirishda nomuvofiqlik kuzatiladi. Bu o‘z navbatida mukammal nazariy qarashlar yaratilishi uchun eksperimental tadqiqotlar yanada zarurligini anglatadi.

Umuman fizika va kimyo tajribaga asoslangan fanlar bo‘lib, jamiyat taraqqiyotida tub burilishlar yasay olishi mumkin. Boshqacha qilib aytganda tajriba bilish jarayonini muhim omili hisoblanadi.

Hozirgi vaqtda fizika, kimyo fanlarining asosiy masalalaridan biri barcha agregat holatlarda moddalarning atom va molekulalari tuzilishini o‘rganishga qaratilgan. Ayniqsa kimyoning turli sohalarida sifat va miqdoriy tahlillarni o‘tkazishda, atom va molekulalarning tashqi ta’sir-temperatura, bosim kabi o‘zgarishlar bilan bog‘liq fizik qonuniyatlarini tadqiq qilishda, elektromagnit nurlanishlarni muhit atom va molekulalari bilan o‘zaro ta’siri hisobiga sodir bo‘ladigan relaksasion jarayonlarni anglashda, ichki molekulyar hamda molekulalararo o‘zaro ta’sir tabiatini tushunishda tadqiqot usullarining orasida spektroskopik tadqiqot usullarining ahamiyati ortib bormoqda.

Bu usullar o‘zining umumiyligi, sezgirligi, alohida moddalarning spektrlarini bir-biridan farq qilishi, tahlil o‘tkazish vaqtining qisqaligi va o‘lchash jarayonini ma’lum etaplarini yoki to‘lig‘icha avtomatlashtirish mumkinligi bilan ham ajralib turadi.

Bu usul yordamida: Moddani tashkil qilgan molekulalarning simmetriyasini, geometriyasini, elektrik xossalarini, optik xossalarini, spektral chiziq intensivligini, yarim kengligini, qutbsizlanish koeffisientini, yadrolar orasidagi masofalarni, xususiy tebranish chastotalarini aniqlash imkoni bor.

Albatta bunday ma’lumotlar elektromagnit radiasiya (Yorug‘lik) haqidagi bilimlarni yanada boyitadi va bu bilimlarni atom, molekula, molekulyar komplekslar haqidagi bilimlar bilan bog‘lab tabiat haqidagi bilimlarimizni bir butunlikga erishishiga ko‘maklashadi.