Овқат ҳазм қилиш аъзолари тизими анатомо-физиологик хусусиятлари ва касалликларида ҳамшира парвариши

Яра касаллигининг асоратлари. Ошқозон ва ўн икки бармоқ ичак яра касаллигида қуйидаги асоратлар юзага келиши мумкин:
Яранинг тешилиши – перфорация. Бу холатда беморларда “Ўткир қорин” синдроми юзага келади.
Ярани бошқа аъзога тешиб кириши – пенетрация, яра ошқозон ости безига ёки бошка аъзоларга тешиб кириши мумкин.
Ярани ракка айланиши – одатда кам секрецияли ошқозон яралари ракка айланиш хусусиятига эга.
Ярадан қон кетиши – ошқозон ёки ичак шиллиқ қаватининг емирилиши оқибатида шиллиқ остидаги қон томирлар хам таъсирланиб, бирор бир жисмоний зўриқиш натижасида ёрилиб кетиши ва қон ошқозон ёки ичак бўшлиғига тушиши мумкин.
Пилорус стенози (Стеноз пилоруса) – одатда кўпроқ дуоденал яраларда ва баъзи холларда ошқозон яраларида кузатилади. Бунда ошқозондан ўн икки бармоқ ичакка ўтадиган соханинг торайиб қолиши кузатилади. Беморларда стеноз ривожланиб бориши билан овқат қабул қилиш оғриқларни камайишига эмас, балки кучайишига олиб келади.
Беморларни даволаш ва парваришлаш.
Яра касаллиги ҳуружи даврида беморларга 1-парҳез столи тавсия этилади. Овқатланиш кунига 5 марта буюрилади ва бунда овқатлар яхши қайнатилган, майдаланган ва буғда пиширилган бўлиши керак.
Дағал, шўр, аччиқ, овқатлар, кофе, аччиқ чой, спиртли ичимликлар, қовурилган гўшт каби махсулотлар тавсия этилмайди.
Беморларга тавсия этиладиган дори воситалари; хлорид кислотани нейтралловчи воситалар (фосфор, алюминий, магний сақловчи), тинчлантирувчи психотроп воситалар, спазмолитиклар, шиллиқ қаватни ҳимоя қилувчи таркибида висмут сақлаган воситалар, инфекцияга қарши препаратлар.


ГИЖЖА КАСАЛЛИКЛАРИ (ГЕЛЬМИНТОЗЛАР)
Гельминтозларни паразит чувалчанглар келтириб чиқаради.
Ривожланиб юқишига кўра гельминтлар 3 гуруҳга бўлинади:
Биогельминтлар – ҳайвонларда ривожланиб одамларга юқади (тениоз)
Геогельминтлар - тупроқда ривожланади (аскарида, трихоцефалёз).
Контактли гельминтлар – бемордан ва буюмлардан юқади.