O‘t oldirish tizimining ishlash prinsipi. Induksion g‘altaklar

Magnetoga texnikaviy xizmat ko‘rsatish va uning nuqsonlari.
Sim va magnetolarning mahkamlangan joylarini har oyda tekshirish, shuningdek magnetoni chang va kirdan tozalab turish lozim. YUqori kuchlanish simlarini almashtirishda yangi sim bo‘lagining o‘rtasini bigiz bilan teshib, chiqish elektrodi uchiga kiygiziladi. So‘ngra sim bo‘lagi elektrod rezbasiga bir necha bor o‘raladi va qalpoqli gayka bilan mahkamlab qo‘yiladi. Mahkamlashning bunday usuli ancha ishonchli bo‘lib, magnetoning to‘xtamay ishlashini ta’minlaydi.
1-texnikaviy xizmat ko‘rsatishda uzgich kontaktlari kirdan benzinga xo‘llangan cho‘tka hamda nadfil bilan tozalanadi, va zarur bo‘lsa, ular orasidagi normal tirqish rostlash vintini otvyorka bilan burab o‘rnatiladi. 0,35 mm yo‘g‘onlikdagi shchup kontaktlar to‘la ajralgan vaqtda ular orasidan o‘tmasligi, 0,25 mm yo‘g‘onlikdagi shchup esa erkin o‘tishi lozim. Uzgichning quruq plitasiga ikki-uch tomchi, o‘qqa esa bir tomchi suyuq moy tomiziladi.
3-texnikaviy xizmat ko‘rsatishda magneto qismlarga ajratiladi, uning detallari iflosdan tozalanadi. Podshipniklarni yuvib, moyi almashtiriladi. Bunda SIATIM-221 moyi ishlatiladi va u podshipniklar hajmining 23 qismigacha quyiladi. Rotorning magnitlanganligi tekshiriladi.
Magnetoning xarakterli nuqsonlari quyidagilardan iborat: uzgich kontaktlarining ifloslanishi yoki kuyishi, ular orasidagi normal tirqishning o‘zgarishi, uzgich prujinasining bo‘shashishi, chiqishlarning uzilishi yoki transformator chulg‘amining shikastlanishi, magnetoning ichiga suv yig‘ilishi.
Agar magnetoda yuqori kuchlanishli tok bo‘lmasa, unda dastlab past kuchlanishli tok zanjiri tekshiriladi. Rotor aylanayotgan uzgich kontaktlari orasidan uchqun chiqishi uning tuzukligini bildiradi. Agar uchqun chiqmasa, past kuchlanishli tok zanjiridagi nuqsonni akkumulyator batareyasi yoki lampa yordamida qidirib topish kerak. Transformator chulg‘amining yaroqliligi chulg‘amlardagi ma’lum qarshilikni ko‘rsatadigan ommetr bilan tekshiriladi. Birlamchi chulg‘amni tekshirish uchun lampa va akkumulyatordan foydalanish mumkin. Magneto qismlarga ajratilgandan so‘ng ho‘l detallar xona temperaturasida quritiladi.