Органик маҳсулотлар тўғрисида 1-боб. Умумий қоидалар 1-модда. Ушбу Қонуннинг мақсади

Лойиҳа

ЎЗБЕКИСТОН РЕСПУБЛИКАСИНИНГ

ҚОНУНИ


Органик маҳсулотлар тўғрисида
1-боб. Умумий қоидалар


1-модда. Ушбу Қонуннинг мақсади

Ушбу Қонуннинг мақсади органик маҳсулотларни ишлаб чиқариш, қайта ишлаш, ташиш, сақлаш ва реализация қилиш соҳасидаги муносабатларни тартибга солишдан иборат.

Ушбу Қонун талаблари шахсий истеъмол учун мўлжалланган
томорқа ер участкаларида ишлаб чиқарилган органик маҳсулотларга нисбатан татбиқ этилмайди.


2-модда. Органик маҳсулотларни ишлаб чиқариш
тўғрисидаги қонунчилик

Органик маҳсулотларни ишлаб чиқариш тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг органик маҳсулотларни ишлаб чиқариш тўғрисидаги қонунчиликда назарда тутилганидан бошқа қоидалар белгиланган бўлса, халқаро шартнома қоидалари қўлланилади.


3-модда. Асосий тушунчалар

Ушбу Қонунда қуйидаги асосий тушунчалар қўлланилади:

инспекция назорати – органик маҳсулотларнинг органик маҳсулотларни ишлаб чиқариш тўғрисидаги қонунчилик ва техник жиҳатдан тартибга солиш соҳасидаги норматив ҳужжатларда белгиланган талабларга мувофиқлигини текшириш;
органик маҳсулотлар – етиштириш, парвариш қилиш, қайта ишлаш ва савдо қилишнинг барча босқичларида органик стандарт талабларига мувофиқ бўлган ишлаб чиқариш технологияларини қўллаш орқали олинган ҳамда сертификатга эга бўлган маҳсулот;
органик маҳсулотларни ишлаб чиқариш – органик маҳсулотларни ишлаб чиқариш тўғрисидаги қонунчилик ва техник жиҳатдан тартибга солиш соҳасидаги норматив ҳужжатларда назарда тутилган усуллар
ва қоидаларга мос келувчи ҳамда якуний мақсади органик маҳсулотларни олиш бўлган фаолият турларининг мажмуи;
органик маҳсулотларни ишлаб чиқарувчи – органик маҳсулотларни ишлаб чиқариш бўйича фаолиятни амалга оширувчи жисмоний ёки юридик шахс;