Organik kimyodan maruzalar matni

Toshko'mir smolasi tarkibida 400 dan ortiq aromatik va geterosiklik birikmalar mavjud bo'lib, uning tarkibidagi organik birikmalar fraksiyalarga bo'lingan holda ajratib olinadi:

Birinchi fraksiya (yengil moy fraksiyasi 170 ⁰C gacha) undan benzol, toluol, ksilol, tiofen, uglerod sulfid, piridin va boshqa mahsulotlar olinadi.

Ikkinchi fraksiya (fenol fraksiyasi 170-210 ⁰C) undan fenol, krezollar, naftalin, inden, kumaron, tarkibida azot va oltingugurt bo'lgan mahsulotlar olinadi.

Uchinchi fraksiya (naftalin fraksiyasi 210-230 ⁰C) undan naftalin, metilnaftalin, tionaftalin, indol va boshqa mahsulotlar olinadi.

To'rtinchi fraksiya (yutib olish fraksiyasi 230-270 ⁰C) undan naftalinning hosilalari atsenaften, fluoren, indol va boshqa mahsulotlar olinadi.

Beshinchi fraksiya (antratsen fraksiyasi 270-360 ⁰C) undan antratsen, fenantratsen, karbazol, parafin va boshqa mahsulotlar olinadi.

Oltinchi fraksiya (toshko'mir pech fraksiyasi 360 ⁰C dan yuqori) undan parafinlar, piren, xrizen va boshqa mahsulotlar olinadi.

Qoramoy-smola haydalgandan keyin qolgan quyuq qora massadan elektrodlar va tomga yopiladigan tol tayyorlash uchun foydalaniladi.