O‘quv qo‘llanma “Durdona” nashriyoti Buxoro 2022

 
Mamlakat ishlari tuzuklari. 
Din-u shariat ishlari tuzukini tartibga keltirganidan keyin, Amir 
Temur saltanat korxonasining tuzugini tuzishga kirishdi. Saltanat 
ishlarini qonun va qoidalar, to‘ra va tuzukka solib, saltanat martabayu 
e’tiborini saqladi. Saltanat obro‘-martabasini saqlash tuzuklari 
quyidagilardir. 
Birinchidan,
saltanat 
qonun-qoidalarini 
islom 
dini 
va 
kishilarning eng xayrlisi (hazrati Muhammad)ning shariatiga bog‘lab, 
izzat-u hurmatlash vojib bo‘lgan onhazratning avlodi va sahobalariga 
muhabbat bildirish asosida tuzdi. Saltanat martabasini to‘ra va 
tuzuklar asosida shunday saqladiki, uning ishlariga aralashishga hech 
bir kimsaning qurbi yetmasdi. 
Ikkinchidan, 
sipoh-u raiyatni umid va qo‘rquv orasida saqladi. 
Do‘st-dushmanni murosayu madora martabasida tutdi. Qilmishlarini, 

---

81 
aytgan gaplarini sabr-toqat va chidam bilan o‘tkazdi. Do‘st-
dushmandan kimki Amir Temurga iltijo qilib kelsa, do‘stlarga 
shunday muomala qildiki, do‘stligi yanada ortdi, dushmanlarga esa 
shunday munosabatda bo‘ldiki, ularning dushmanligi do‘stlikka 
almashdi. 
Amir Temur biron kimsaning haqi bo‘lsa, haqini hech vaqt 
unutmadi. Biron kimsa bilan tanishgan bo‘lsa, uni hech vaqt nazaridan 
chetda qoldirmadi. Davlati va saltanati quyoshi ko‘tarilib kelayotgan 
vaqtda Amir Temurga iltijo qilib kelgan yaxshi-yomon odamlar, xoh 
yaxshilik, xoh yomonlik qilgan bo‘lsin, saltanat taxtiga o‘tirganidan 
keyin ularni xayr-ehsonlari bilan xijolatga qo‘ydi. O‘zini ularning 
yomonliklarini unutgandek tutib, yomon qilmishlari daftari ustiga afv 
qalamini tortdi. 
Uchinchidan,
hech kimdan o‘ch olish payida bo‘lmadi. Tuzini 
totib, unga yomonlik qilganlarni Parvardigori olamga topshirdi. Ish 
ko‘rgan, sinalgan, shijoatli er yigitlarni qoshida tutdi. Sofdil kishilar, 
sayyidlar, olimlar va fozillarga dargohi doim ochiq edi. Nafsi yomon 
himmatsizlarni, ko‘ngli buzuq qo‘rqoqlarni majlisidan quvib yubordi.