O‘qitishning interaktiv”Kuchsiz zveno” usullari uchun savollar

Урогенитал хламидиоз
Қўзғатувчиси Ch.trachomatis нинг D, F, G, H, I, J, K сероварлари ҳисобланади. Хламидиозда касалликнинг клиник кўриниши бўйича 20 дан ортиқ синдромни кузатиш мумкин. Жумладан, гонококксиз ёки гонококкдан кейинги уретрит, эпидидимит, проктатит, цервицит, сальпингит, перигепатит, фарингиал инфекция, зотилжам, отит, вульвовагинит ва бошқа патологик ҳолатлар. Аёлларда хламидиялар фаллопий найлари ўтказувчанлигининг бузилиши, бепуштлик, бола ташлаш, хомиланинг она қорнида касалликка чалиниши ва шу билан бирга неонатал ўлимга сабаб бўлиши кузатилади.
Гонококксиз уретрит билан касалланган эркакларнинг 40% кишиларда, гонококкдан кейинги уретритларнинг 60–80%да хламидиялар топилган, Рейтер синдроми (уретро-окуло-синовиал синдром)нинг оғир системик касаллик этиологиясида роли бор. Реактив артрит билан оғриган 418беморнинг 164 (39,2%) тасида хламидия ва уреаплазма инфекцияси борлиги кузатилган.
Сийдик таносил аъзолари хламидиози (урогенитал хламидиоз) клиник кўриниши бўйича сўзакка, трихомониазга ўхшаб кетсада, ўзига хос белгилари билан ундан фарқ қилади. Бунда яллиғланиш ўткир ёки суст, кўпроқ асорат билан кечади, сўзакка қарши антибактериал препаратларга анча чидамли бўлади.
Беморларнинг кўпчилигида бир неча ҳафтадан сўнг спонтан тузалиш кузатилади. Аммо бундаги клиник ўзгариш этиологик ўзгаришга олиб келмайди. Даволанмаган беморларнинг кўпчилигида турли асоратлар: эпидидимит, орхоэпидидимит, геморрагик цистит, уретра стриктураси кузатилади.
Лаборатория ташҳиси. Текшириш ишларини бекаму-кўст бажариш ҳамда олинадиган маълумотларнинг аниқ бўлишини таъминлаш мақсадида бемордан материал олишда қуйидаги умумий қоидаларга амал қилиш талаб этилади.
1. Беморга суртма топширишдан олдин (хламидияни аниқлаш учун 2–2,5 соат) сиймаслик тавсия этилади. Материални эрталаб олиш мақсадга мувофиқ.
2. Текшириш олдидан бир ой мобайнида бемор доксациклин, тетрациклин, эритромицин, рифампицин ва аминогликозидлар каби дориларни қабул қилмаган бўлиши керак.
Хламидияларни аниқлаш учун материал олишда, сийдик-таносил аъзолари шиллиқ қавати цилиндрик эпителийсини танлаб шикастлантиришни унутмаслик керак. Ажралма жуда кам бўлса ёки умуман бўлмаса, у ҳолда уретра массаж қилинади, кейин Фолькман қошиқчаси билан 3–5 см ичкаридан эҳтиётлик билан қон чиқармай ажралма олинади ва уни ёғсизлантирилган тоза буюм ойнасига бир текис қилиб суртилади. Одатда аёлларнинг уретраси, бачадон бўйни ва баъзан тўғри ичак шиллиқ қаватидан суртма олинади.