Оғиз бўшлиғи аъзолари ва юз-жағ соҳалари тўқималарини

Юқори лаб туғма нуқсонларини жарроҳлик усуллари
билан даволаш 
Юқори лабнинг бир томонлама туғма нуқсонларини жарроҳлик йўли билан 
даволаш (бартараф этиш) усуллари 
Юқори лабнинг анатомик шаклини ва фаолиятини тиклаш учун жарроҳ
учта вазифани бажариши керак: 
Айлана мушак толаларини бирлаштириб, кемтикни бартараф этиши; 
Кемтик томонда қисқарган юқори лабни узайтириши; 
Бурун шаклини тиклаши. 
Ҳозирга қадар, ишлаб чиқилган талай жарроҳлик усулларининг аксарияти 
тарихий аҳамиятга эга. Амалиётда ишлатилиб келинаётган усуллар, терида 
ўтказиладиган кесмалар шаклига кўра, уч шартли гуруҳларга бўлинган: 
“чизиқли”, “учбурчакли”, “тўртбурчакли”. 
Биринчи гуруҳга Евдокимов, Лимберг, Миллард усуллари киритилиб 
“чизиқли” усуллар деб аталади. Бу (чизиқли) усуллар бир биридан , лабнинг 
тўлиқ кемтикларида бурун тешиклари асосига шакл бериш услуби билан 
фарқланади. 
407 

---

Юқори лаб бир томонлама туғма кемтигининг Евдокимов А.И. (1950) 
усули бўйича хейлопластикаси
Юқори лаб катта бўлагининг кемтик чўққисидан горизонтал қисмигача 
ҳамма қатламлари (шиллиқ парда, мушак), кесилиб лахтак ҳосил қилинади. Кичик 
бўлакда (чизмада кўрсатилганидек) иккита: юқори (кичик) бурун қаноти асосида 
ва пастки (катта)- пастки лаб қизил ҳошиясида лахтаклар кесилади. Бўлаклар бир 
бирига таранг тортилмай яқин келиши учун, ўтув бурмасида кесмалар ўтказилиб, 
лаб бўлаклари юқори жағнинг олд юзаси ва ноксимон тешик қиррасидан 
ажратилади. Кичик лахтак, бурун тўсиғи ёни терисида ҳосил қилинган ярага 
тортиб тикилади ва бурун тешиги шакллантирилади. 
Лаб кемтиги четларидан бичиб олинган лахтаклар устма уст қўйилиб, 
ортиқча қисми кесиб ташланади. Қаватма-қават (шиллиқ парда, мушак, тери) 
чоклар қўйилади. 
Евдокимов А.И. таклиф қилган усул бўйича кесмалар фақат кемтик четида 
ўтказилиб, лаб терисида сезиларли чандиқлар қолдирмайди, камчилиги лаб 
калталигича қолиб, юқорига сезиларли тортилиб қолади. Эстетик жиҳатдан 
қониқарсиз бўлганлиги учун ҳозирги даврда деярли фойдаланилмайди.