O qo‘shmurodov, B. Shukuriddinov

Egirin NaFe³⁺ [Si₂O₆] Tarkibida Na₂O – 13,4 %, Fe₂O₃ – 36,4 %, SiO₂ – 52%. Monoklin singoniyali, prizmatik ko‘rinishda. Ko‘pincha cho‘ziq prizmatik ustunsimon yoki ignasimon, yonlarida tik chiziqchalari bor. Rangi yashil, to‘q yashil, yaltirashi shishadek, qattiqligi – 5,5–6. Egirin ishqorlarga boy intruziv va vulkan jinslarda – fonolit va boshqalarda asosiy jins hosil qiluvchi mineral sifatida keng tarqalgan.

LENTASIMON SILIKATLAR Amfibollar guruhi

Amfibollarning hozirda ma’lum bo‘lgan 70 dan ortiq minerallari mavjud. Ularning kimyoviy ifodasi xilma-xil bo‘lishiga qaramay, ularning fizik-kimyoviy xususiyatlari bir-biriga o‘xshab ketadi. Amfibollar prizma shaklida kristallanib, prizma tekisliklari (110) o‘zaro 124°30′ burchak hosil qiladi. Bu belgilari bilan o‘zlariga o‘xshash bo‘lgan piroksenlar guruhidan farqlanadi. Barcha amfibollar kristall singoniyalari va tarkibiga ko‘ra ikkiga: rombik va monoklinlarga bo‘linadi.