Нефтни қайта ишлашда каталитик жараёнлар фанида маърузалар матни

Гидрокрекинг жараёнининг кинетикаси

Гидрокрекинг жараёнида кетадиган реакцияларни кинетикаси кам ўрнатилган.

Гидрокрекинг жараёнлари катализаторлари

Гидрокрекинг жараёнида юқори сифатли мотор ва реактив ёқилғи, сурков мойлари олиш учун гидридлаш изомерлаш, олтингугуртсизловчи ва парчаловчи фаоллиги юқори бўлган катализаторлар ишлатилади.

Гидрокрекинг катализаторлари асосан қуйидаги компонентлардан иборат:

1. 
   катализаторга кислотали хусусият берувчи аморф ёки алюмосиликат компонентлар бўлиб, катализатор парчаловчи ва хоссаларни кўрсатади;
   
2. 
   металл ёки унинг металлар бирикмаси қайтарилган ҳолда, у катализаторга изомерловчи ва гидридловчи хусусиятни беради;
   
3. 
   боғловчи, механик мустаҳкамлик берувчи ва ғовак тузилишни ҳосил қилувчи компонентлардир.
   

Саноат миқёсида гидпрокрекинг жараёнида таркибида цеолит бўлган ва оксиносулфид катализаторлар ишлатилади. Катализатор таркибига цеолитнинг ҳар хил катион формада ва тузилишга эга бўлган ва уни каталитик тизимга қўшиш усуллари билан қўшиб катализаторнинг фаоллигини ва таллабчанлигини ўзгартириш мумкин. Гидрокрекинг катализаторлари полифункционал бўлиб гидридлаш ва парчалаш хусусиятига эга бўлиши керак.

Бензинни гидрокрекинг қилиш йўналиши бўйича катализатор юқори парчаловчи полициклик ароматик углеводородларни водород билан гидридлаши ва олтингугуртли, азотли бирикмалар билан заҳарланишига барқарор бўлиши керак.
Оғир нефт маҳсулотларидан бензин олишда катализатор таркибида цеолитнинг фожазит тури ишлатилади. Катализаторларни синтез қилишда гидридловчи хоссасини вужудга келтириш учун унинг таркибида Ni (Co) – Mo фазаси бўлиши керак. Шунинг учун цеолитнинг Y таркибига ион алмашиш усули билан Co ёки Ni киритилади. Катализаторнинг парчалаш хусусиятини ошириш учун катализаторнинг таркибига галоген киритилади ёки цеолит таркибидан алюминий ионларини чиқариб юборилади.
Гидрокрекинг катализаторларини гидридлаш компонентлар сифатида платина гуруҳининг металлари 0,5-3%, 2-10% Ni ёки 2,5-5% Ni (Co) ва 5-10% Mo(W) сулфид кўринишидаги хиллари ишлатилади.
Ташувчилар сифатида алюминий оксиди, алюмосиликатлар SiO₂, MgO, AlPO₄ ишлатилади. Катализатор таркибида цеолитнинг миқдори 10-90% оралиғида бўлади.
Гидрокрекинг жараёнида қўлланиладиган таркибида металл цеолит бўлган катализаторлар ишлатилганда, улар олдин юқори ҳароратда қиздирилади ва водород иштирокида қайтарилади. Таркибида Mo ёки W бўлган катализаторлар одатда сулфидланади.
Оғир нефт фракцияларини гидрокрекинг қилиш ва юқори сифатли реактив ва дизел ёқилғиси, юқори қовушқоқликка эга бўлган ва паст ҳароратда қотувчи мой олиш учун катализаторнинг таркибида CoO, MoO₃ 0,1-5% P ва таркибида бор (В) бўлган цеолит ишлатилади.
Гидрокрекинг жараёнида ишлатиладиган хом-ашёни хилига ва катализаторнинг фаоллигига қараб, ҳарорат 400-450С, босим 4-7МПа, ҳажмий тезлик 0,5-1с^-1 да ва таркибида водород бўлган газ аралашмасининг айланиши 1000-1500 м³м³ хом-ашёга нисбатда олиб борилади.