Nazariya javoblari

128-savol. Urug‘chilik jamiyati va uning xususiyatlari.
Urug‘chilik tuzumining eng muhim xususiyati bo‘lib, kishilarning o‘zaro uyushganligi hisoblanadi. Qadimgi odamlarning turmushi va ongi jamoatchilik, aniqrog‘i, tabiiy jamoatchilikka asoslangan. Bunday turmush tarzida alohidalik, shaxs o‘zboshimchaligiga o‘rin bo‘lmagan. Jamoa — inson ongi shakllanadigan va rivojlanadigan, dunyo to‘g‘risidagi qarashlar, tajriba va bilimlar asta-sekinlik bilan hosil bo‘ladigan va ijtimoiylashuvning an’anaviy shakllari orqali guruhning har bir a’zosiga yetkaziladigan tabiiy soha hisoblangan. Insonlar azaldan birgalikda, uyushib yashashga moyil bo‘lgan. Bu davrda tabiatda mavjud bo‘lgan mahsulotlarni terib-termachlab yig‘ish va yovvoyi hayvonlarni ovlash shakli amal qilgan. Urug‘chilik tuzumida mavjud ishlab chiqarish — terib-termachlab yig‘ish, kichik va yirik hayvonlarni ovlash natijasida to‘plangan mehnat mahsuli butun jamoa ixtiyoriga topshirilgan hamda uning barcha a’zolari o‘rtasida taqsimlangan. Taqsimot vaqtida mahsulotlarni yig‘ish yoki ovda ishtirok etganlik inobatga olinmagan.Urug‘chilik jamoa tuzumida uning barcha a’zolari teng huquqli bo‘lib, urug‘, qabilaning eng muhim masalalari urug‘ a’zolarining umumiy yig‘inida muhokama etilgan va hal qilingan. Urug‘ning har bir voyaga yetgan a’zosi har qanday ishni ko‘rib chiqish va hal etishda ishtirok etishi mumkin bo‘lgan. Tashqi harbiy bosqinlardan himoyalanish, hududni muhofaza etish, ishlab chiqarish, sug‘orish va dehqonchilik ishlarini samarali tashkil etish, jamoaning ichki va tashqi aloqalarini olib borish, diniy urf-odatlarni amalga oshirish, jamoa a’zolari o‘rtasida vujudga keluvchi nizoli masalalami hal etish, umuman urug‘ni boshqarish kabi muhim vazifalarni bajarish jamoa a’zolari orasidan saylab qo‘yiladigan oqsoqollarga yuklatilgan.
129-savol. Davlat muassasalarini tushuntirib bering.	Davlat muassasalari — davlat organlari kabi hokimiyat vakolatiga ega bo‘lmay, davlatning oldida turgan umumijtimoiy vazifalarni bajaruvchi idoralar, masalan, kasalxonalar, maorif, teatr va boshqalar. Ushbu muassasalar hokimiyat vakolatiga ega bo‘lmasada, lekin jamiyat oldida turgan ijtimoiy ahamiyatga ega bo‘lgan muhim vazifalarni bajaradilar.