Navoiy shahar 2- umumiy o`rta ta’lim maktabi Ona tili va adabiyot yo‘nalishi metodbirlashma rahbari Yuldosheva Ma’mura G`aybulloyevna tomonidan o‘tkazilgan metodik tadbirlar to‘g‘risida ma’lumot

Usulning tavsifi: Ushbu usul ona tili fanidan o‘quvchilarni o‘tilgan mavzularni yodga olishga, mantiqan fikrlab, berilgan savollarga mustaqil ravishda to‘g‘ri javob berishga va o‘z fikrini ilmiy asoslashga, gaplarni sintaktik, morfologik va morfemik tahlil qilishga o‘rgatishga, hamda qisqa vaqt ichida o‘qituvchi tomonidan ko‘proq o‘quvchilarning egallagan bilimlarini baholashga qaratilgan.
Usulning maqsadi: o‘quvchilarning o‘tilgan mavzu bo`yicha bilimlarini mustahkamlashga, o‘z fikrlarini mustaqil ravishda erkin bayon eta olish, o‘zlarini baholash, yakka ishlashga,fikrini ilmiy asoslashga o‘rgatadi, sintaktik, morfologik va morfemik tahlil malakalrini rivojlantiradi, o‘ziga bo‘lgan ishonchni orttiradi.
Usulning qo‘llanilishi: bu usul o‘quv mashg‘ulotlarining barcha turlarida dars boshlanishi yoki dars oxirida yoki o‘quv predmetining biron bir bo‘limi tugallanganda, o‘tilgan mavzularning o‘quvchilar tomonidan o‘zlashtirganlik darajasini baholash, takrorlash, mustahkamlash uchun mo‘ljallangan. Ushbu usulni mashg‘ulot jarayonining bir qismida yakka shaklda tashkil etish mumkin.
Usulni amalga oshirish tartibi: Dars boshlangach, o`tilgan mavzuni so`rash uchun jurnaldan bahosi kam bo`lgan 6 ta ( talabga qarab, oquvchi soni cheklanmagan) o`quvchi chaqirilib, sinf partalarining oldingi qatoriga joylashtiriladi. Ba’zida o‘quvchilarning o`ziga bo`lgan ishonchini orttirish va ularga motivatsiya berish maqsadida ularning xohishiga ko‘ra ham o‘tkazish mumkin.Bu usulda ko‘p o‘quvchi qamrab olinsa ham, lekin har bir o‘quvchi o‘zi uchun harakat qiladi, ular yozgan javoblariga qarab alohida-alohida baholanadi. Har bir o‘quvchiga 3 tadan topshiriqlar yozilgan alohida varaqlar tarqatiladi. Topshiriqlar quyidagi shakllarda bo`ladi:

1. 
   O‘quvchining o‘tilgan mavzu bo‘yicha nazariy bilimlarini sinash uchun savol.
   
2. 
   O‘quvchining 1-topshiriqdagi nazariy bilimini amalda qo‘llay olish malakasini rivojlantiruvchi topshiriq. Bu topshiriqni tayyorlashda o‘qituvchi o‘quvchilarning o‘zlashtirish darajasini hisobga olishi lozim. Shuningdek, ijodkor bo‘lishi lozim. O‘quvchini o‘ylantiradigan, izlanishga undovchi , o‘rgangan nazariy bilimini amalda qo‘llay olish malakasini rivojlantiruvchi topshiriq berishi lozim.
   
3. 
   O‘quvchining gapni sintaktik, morfologik yoki morfemik tahlil qila olish malakasini rivojlantiruvchi topshiriq. (Bunda o‘quvchining bilimidagi bo‘shliqqa qarab tahlil turi tanlanadi.)
   

Bu usul yozma bajartiriladi.Buni bajarish uchun 10 daqiqa vaqt beriladi.