Наманган давлат университети Наманган муҳандислик-қурилиш институти

II боб бўйича хулоса
Турли мамлакатлардаги кичик тадбиркорликка нисбатан олиб борилаётган давлат сиёсатини таққослар эканмиз, кичик тадбиркорликни ривожлантириш муаммоларига турлича ёндашувлар мавжуд. Масалан, АҚШ ва Япония мамлакатларида кичик бизнес секторининг ривожланиши солиштирилганда, иқтисодиёт тармоқларида сезиларли даражадаги фарқни кузатиш мумкин. АҚШда хизмат кўрсатиш ва чакана савдо тармоқларида кичик бизнес корхоналари улуши жуда катта бўлса, Японияда кичик корхоналар сони асосан саноат тармоғида устувордир.
Европа Иттифоқига кирган давлатларда кичик тадбиркорлик секторига бўлган муносабатларда мамлакатлараро ягона сиёсат юритишга ўтиш зарурияти юзага келмоқда. Бозор иқтисодиёти шароитида шунга мос равишда меъёрий ҳужжатлар ишлаб чиқилиб, уларни муҳокама қилишда ЕИ ва жаҳон иқтисодиёти таркибидаги ҳар бир мамлакат ўз нуқтаи назаридан келиб чиқиб фикр билдирилмоқда.
Илмий тадқиқотларимиз натижаларига кўра ривожланган мамлакатларда ишбилармонлик муҳити жуда қулай бўлиб, тадбиркорларнинг иқтисодий муносабатлардаги иштироки учун шароитлар жуда яхши таъминланган. Буни ҳар йили Жаҳон банкининг «Doing Business» (DB) гуруҳи томонидан олиб борилаётган тадқиқотлар натижалари ҳам тасдиқлайди. Аксинча, айрим ривожланаётган давлатларда (яъни, Афғонистон, Сомали, Конго, Сьерра-Леоне, Шимолий Корея, Нигерия, Бангладеш, Бурунди, Либерия, Зимбабве) ишбилармонлик муҳити жуда суст шаклланмоқда. Бу давлатларда ишбилармонлик муҳитини яхшилашдан аввал мамлакатнинг ижтимоий-иқтисодий ривожланишига доир жиддий ислоҳотларни жорий этиш мақсадга мувофиқ деб ҳисоблаймиз.
Мамлакатимизда ҳам кичик бизнес субъектлари фаолиятининг келажаги ишбилармонлик муҳитининг у ёки бу даражаси билан белгила-нади. Ишбилармонлик муҳити яхшиланиб бориши мамлакатнинг ижтимоий-иқтисодий ривожланиши жадаллашувида ва аҳоли фаровонлиги юксалишида муҳим роль ўйнайди. Шунинг учун ҳам эришилган ютуқларни инкор этмаган ҳолда бу борада давлат томонидан қабул қилинаётган меъёрий-ҳуқуқий асосларни такомиллаштирилиши ва тадбиркорликнинг бошқа шартлари яхшиланиши борасидаги ишлар изчил давом эттирилиши лозим.