N. Hakimov, E. Abdullayev, F. Halimov, A. Xamidova umurtqasizlar zoologiyasidan amaliy mashg’ulotlar

Ishni bajarish

1-ish. Formalinda fiksatsiyalangan bodyaga tanasini qo’l lupasi yordamida diqqat bilan o’rganing. Tana yuzasidagi oskulyar teshikchalar va oskulumga e’tibor bering. Dermal hujayralar oralarida mayda teshikchalar (suv kiruvchi poralar) ga e’tibor bering.

2-ish. Fiksasiyalangan bodyaga tanasidan biroz qismini kesib olib, uni probirkaga solib, ustidan 1% li o’yuvchi kaliy eritmasi qo’yilib, probirka spirtovkada qizdiriladi, lekin qaynamasligi lozim. Qizdirilgan bo’lakcha erib, cho’kmaga tushadi. Ushbu cho’kma ajratib olinib, bir necha marta suvda yuviladi. Undan tomizgich yordamida bir tomchi olinib buyum oynasiga tomiziladi va mikroskopning kichik va keyin katta obyektivlarida ko’riladi. Preparatda mayda tayoqchasimon spikulalarni topishga harakat qiling.

3-ish. Bodyaganing koloniyasini umumiy ko’rinishini, spikulalar bilan spongin tolachalarini hamda gemmulani umumiy va kesma holdagi ko’rinishlarini daftaringizga chizib, ifodalab qo’ying.

4-ish. G’ovaktanlilarning morfologik tuzilish tiplarini ko’zdan kechiring. Askon, sikon va leykon tiplarini sxematik rasmlarini daftaringizga chizing va izoh bering.