Murakkab sharoitlarda neft va gaz quduqlarini qazish

4 .7-rasm. Burg’ilash quvurlari
Quvurga mufta (nippel)ni birlashtirgandan keyin yuqorida qayd etilgan texnologiyaga asosan barqarorlashtiruvchi halqa burg’ilash qulfi detaliga yaxlit halqasimon chok qilib payvandlanadi.

Barqarorlashtiruvchi halqani qo‘llash bu quvurlarning ish ko‘rsatkichlarini 3 va 4 turdagi quvurlarga yaqinlashtiradi.

Burg’ilash qulflarining yeyilishga chidamligini oshirish uchun yangi soddalashtirilgan texnologiyada tayyorlangan yuzasi qattiq qotishmali yopiq dumaloqsimon nippelli va muftali belbog‘lardan foydalaniladi. Nippelning yuqori qismiga bitta va muftaning pastki qismiga esa ikkita belbog‘lar ishlatiladi. Burg’ilash quvurlari va ularning tutashtiruvchi elementlari ishlatishga tayyorlangandan keyin, ular jamlanib, tamg‘alanib kompektga guruhlanadi. Komplektni uzunligi quduqni chuqurligiga va ishlarning to‘g‘ri tashkil etilishiga qarab burg’ilash korxonalari tomonidan aniqlanadi. Komplekt tarkibiga bir xil mustahkamlikka ega bo‘lgan materiallardan tayyorlangan quvurlar kiradi. Ularning turlari, mustahkamlik guruhi, diametri va devor qalinliklari ham bir xil bo‘ladi.

Saralangan bir komplekt tarkibiga bitta zavodda tayyorlangan quvurlar kiradi. Har bir komplektga tartib raqami, quvurga esa komplekt ichida raqamlar beriladi. Komplektga jamlangan burg’ilash quvurlari uchun burg’ilash bazasida pasport jurnali tuziladi. Quvurlar komplekti har bir quduq uchun ularning konstruksiyasi asosida oraliqlarni burg’ilash usuli va burg’ilash rejimiga qarab tanlanadi.

Har bir oraliqni burg’ilash uchun og‘irlashtirilgan burg’ilash quvurlar komplekti uzunligi, turi, diametri, ular tayyorlangan materiallarning mustahkamlik guruhi, burg’ilash quvurlarining turi, diametri, devor qalinligi, ular tayyorlangan materiallarning mustahkamlik guruhi, yetakchi quvurlar turi va diametri tanlanadi. Undan tashqari, diametri burg’udan yuqoriga qarab kamayadigan ikki va uch seksiyali og‘irlashtirilgan burg’ilash quvurlaridan ham foydalanish mumkin.

Shuningdek diametri, devor qalinligi, tayyorlanadigan materiallari (po‘lat, alyuminiy) va mustahkamlik guruhi materiallari (D, K, YE) bilan farqlanadigan bir necha seksiyali burg’ilash quvurlar birikmalarini ham komplektlash mumkin.

Burg’ilash tajribasiga va quvurlarni ishlatish qulayligiga qarab, quduqning har bir oralig‘i uchun quvurlar birikmasi tarkibi tanlanadi. Shuning uchun kam sonli seksiyadan tashkil topgan burg’ilash quvurlari birikmasiga ko‘proq e’tibor beriladi. Chunki bir xil mustahkamlikga ega bo‘lgan materiallardan tayyorlangan burg’ilash quvurlari birikmasini va burg’ilash quvurlarini ishlatish ancha qulay bo‘ladi.

Tanlangan burg’ilash quvurlarining tarkibi oldindan mo‘ljallab qo‘yilgan har bir quduq uchun biriktirilib qo‘yiladi. Bu quvurlar birikmasi komplektlari quduqlarga burg’ilash ishlarini boshlashdan oldin yoki burg’ilash jarayonida pasport jurnali bilan birga olib keltiriladi. Quvurlar birikmasini ishlatish maxsus tuzilgan grafik asosida amalga oshiriladi. Bu grafik asosida quvur birikmasining nosozligi tekshiriladi. Quvur, qulf va burg’ilash birikmasi elementlarining yeyilish holatlari nazorat qilinadi.

Burg’ilash qulflarining tashqi yuzasi va qulf rezbalarining yeyilish holatlari ham uchta sinf bilan baholanadi.