Мужизакор бола

БОЛАГА ОТАСИНИ ЁМОНЛАСАЛАР

Фарзандларга ҳеч қачон отасини ёмонлаш керак эмас, хоҳ у вафот этган бўлсин, хоҳ ажрашган бўлсин, хоҳ бирга яшаётган бўлсин. Ҳар қандай вазиятда ҳам. Ота пулдорми, пулсизми, яхшими, ёмонми, бунинг фарқи йўқ. У қандай инсон бўлмасин, қаерда бўлмасин, қандай ишлар қилган бўлмасин, уни ёмонлаш, қарғаш керак эмас. Бундан отага ҳам, онага ҳам зарар йўқ. Зарар фақат болага тегади. Юқорида айтганимдек, бола мисоли оппоқ қоғоз, унга нима ёзилса шуни бажаради. Унинг мурғак қалбига, отам ёмон инсон, деб ёзилиб қолади. Сўнгра унда отага нисбатан нафрат уйғонади. Бу нафрат эса унинг келажагига, яшаш тарзига таъсир қилади. ОТА – БУ ПУЛ, ОТА – БУ ДАВЛАТ, ОТА – БУ МАНСАБ. Ота рози – Худо рози, отанг тўнғиз бўлса ҳам боғлаб боқ, деб бежиз айтишмаган экан-да. Сизнинг эрингиз жуда тўнғиз эмасдир. Акс ҳолда, сиз унга турмушга чиқмаган бўлар эдингиз. Фарзанднинг отага бўлган нафрати пул, бизнес, мансаб, даромад йўлларини тўсади.

Агар эр ва хотин ажрашган бўлишса, бу ҳолатни болага тўғри тушунтирган маъқул. Дадаси ҳам яхши инсон эканини, фақат бир-бирларини тушуна олмаганликларини, дунёқарашлари мос келмаганлигини айтиш мумкин.
Аксини қилсангиз ўғил ёки қизингиз пул танқислигида яшайди, ўз бизнесини йўлга қўя олмайди, мансабда кўта-рила олмайди. Ота ёмон, пул ёмон, бойлик ёмон, мансаб ёмон, деб ёзилиб қолган бўлади унинг миясига. Сиз буни ўқий олмайсиз, тушунмайсиз. Турмуши ўхшамаган аёл болани дадасидан яшириши, кўришишга рухсат бермас-лиги, ўзини оқлаб, эрини ёмонлаши маъқул эмас. Нафақат дадасини, амаки, боболарини ҳам ёмонламаслик зарур. Майли, улар сиздан ҳол-аҳвол сўрамаётган бўлсин. Моддий ва маънавий томондан қўлламаётган бўлсин. Ҳечқиси йўқ. Сиз Яратгандан сўранг. Бандасига муҳтож қилмасин. Нима эҳтиёжингиз бор, нимани истайсиз, сизга нима керак? Аниқ, равон сўранг. Қанча эҳтиёжингиз бўлса ҳам уялмай сўрай-веринг. Қўл очиб, болаларингизни дуо қилинг. Яратган тап этиб осмондан ташлаб қўймайди. Лекин бандаси орқали юборади. Сиз кутганлардан эмас, кутмаганлардан.