Moliya-iqtisod

I bob bo’yicha xulosa

Qisqacha qilib aytadigan bo’lsak, ayni paytda amal qilayotgan soliqlar va soliq tizimi mamlakatimizda davlat budjetini to’ldiruvchi asosiy manba hisoblanadi. Davlat budjeti daromadlarining qariyb 90-95 % i har yili soliqlar hisobiga shakllantiriladi.

O’zbekiston Respublikasi Soliq Kodeksida keltirilishicha soliqlar deganda ushbu kodeksda belgilangan, muayyan miqdorlarda undiriladigan, muntazam, qaytarib berilmaydigan va beg’araz xususiyatga ega bo’lgan, budjetga yo’naltiriladigan majburiy pul to’lovlari tushuniladi. Yuridik va jismoniy shaxslardan olinadigan soliqlar, yig’imlar, bojlar va boshqa majburiy to’lovlar hamda ularning tuzilish tamoyillari, usullari, soliq nazoratining yig’indisi soliq tizimini tashkil etadi. Mamlakatimz soliq tizimi to’g’ri va egri soliqlarga bo’lib o’rganiladi.

Mamlakatimizda soliqlar va soliqqa tortish tizimi huquqiy asoslarini yaratishga, ularni mustahkamlab borishga mustaqillikning dastlabki yillaridanoq katta e’tibor berib kelinmoqda. Bu sohada qator me’yoriy-huquqiy hujjatlar qabul qilingan bo’lib, 2008-yilda yangi Soliq kodeksining qabul qilinishi bu boradagi islohotlarni yangi bosqichga olib chiqdi.

Soliq tizimida har yili turli islohotlar olib borish orqali uni yanada takomillashtirishga harakat qilinmoqda. Bu borada ham o’zimizdagi mavjud imkoniyatlardan va tarixiy tajribadan, ham xorijiy davlatlar tajribasidan foydalanilmoqda. Mamlakatimizda mukammal soliq tizimini yaratish orqali mamlakatimiz iqtisodiyotini yanada yuqori bosqichga olib chiqishga harakat qilinmoqda. Bu borada soliqlarning rag’batlantiruvchi funksiyasidan oqilona foydalanish orqali har yili iqtisodiyotimizda ishlab chiqarish sur’atlari o’sishi ta’minlanmoqda.