«Минерал ўғитлар технологияси» фани бўйича: Минерал ўғитларнинг халқ хўжалигидаги аҳамияти

Қўшалоқ суперфосфат ишлаб чиқариш технологик схемалари.
1.11- расмда камерали усул билан қўшалоқ суперфосфат ишлаб чиқариш схемаси тасвирланган. Бу усул жараёнлар кетма-кетлиги бўйича ҳам, ишлатиладиган жиҳозлар бўйича ҳам оддий суперфосфатнинг ишлаб чиқаришдаги камерали усулга ўхшайди. Апатит концентрати ва концентрланган фосфат кислота аралаштиргичга узлуксиз бериб турилади, ҳосил бўладиган суспензияга озгина миқдорда (апатит массасининг 3% гача) майдаланган охактош кукуни қўшилади. Шу ҳисобига камерада шаклланадиган суперфосфат массаси (оҳактошнинг парчаланиши натижасида ҳосил бўладиган карбонат ангидрид ҳисобига) ғоваклашиб қолади ва камерадан осонлик билан фрезер ёрдамида туширилади. Массанинг туриш вақти аралаштиргичда 3…6 минутни, камерада 1…1,5 соатни, температураси эса аралаштиргичда 70…80°С ни, камерада 90…100°С ни ташкил қилади. Ҳозирда қўлланилаётган (7,1 м диаметрли) камераларга реагентларнинг бир соатдаги сарфи: апатит 12…13 тоннани, фосфат кислота (52…54 % Р₂О₅) 22-24 тоннани, оҳактош 0,4 т ни ташкил этади. Камерадаги массани шакллантириш баландлиги 1,2…2 м га тенг. Фосфор кислотага концентрланган сульфат кислота ҳам қўшилиши мумкин; бу эса (маҳсулот бирлигига нисбатан) фосфат кислота солиштирма сарфини камайтириш имконини беради, ундаги Р₂О₅ ни қисман (51…52% гача) камайтиради. Камерада апатит концентратининг парчаланиш даражаси 70% дан ошмайди. Камерали қўшалоқ суперфосфатни омборли етилтиришда ҳам худди оддий суперфосфатдаги каби ишлар амалга оширилади, бунда парчаланиш даражаси 77…80% гача кўтарилади. Сўнгра унинг эркин кислоталилигини камайтириш учун оҳактош кукуни ва бошқа қўшимчалар билан нейтралланади ва донадорланади. Камерали усулда (100 кг апатитга 110 кг Р₂О₅ ҳисобидан фосфат кислота меъёри бўйича) олинган қўшалоқ суперфосфат таркибида 43…44% ўзлашадиган Р₂О₅ бўлади. 1 т ўзлашадиган Р₂О₅) ҳисобидаги донадорланган қўшалоқ суперфосфат ишлаб чиқариш учун 320…330 кг (Р₂О₅ ҳисобида) апатит ва 810…820 кг (Р₂О₅ ҳисобида) фосфат кислота сарфланади.