Microsoft Word Tursunboyev S. O'zbek teatri tarixi. Majmua

SALOHIDDIN SIROJIDDINOV 
(1957)
 
 
Jurnalist  va  dramaturg  Salohiddin  Sirojiddinov  Andijon  viloyat  Baliqchi  tuman 
Chinobod  qishlog’ida  xizmatchi  oilasida  tug’ilgan.  A.  Qodiriy  nomidagi  Toshkent  Davlat 
Madaniyat  instituti  havaskorlik  jamoalari  rejissorligi  bo’limida  (1975—1979),  M. Uyg’ur 
nomidagi Toshkent Davlat san’at institutining ikki yillik dramaturglik kursida (2001) tahsil 
ko’rgan. Toshkentdagi Oybek nomli madaniyat uyi direktori, Respublika Madaniyat ishlari 
vazirligi  xalq  ijodiyoti  boshqarmasi  va  «O’zbektelefilm»da  muharrirlik  lavozimlarida 
ishlagan.  Hozirgi  kunda  Respublika  radiosida  teatr  eshittirishlari  bo’limida  muharrir 
vazifasida ishlab keladi. 
Uning  «Beozor  laylaklarga  tegmang»  degan  birinchi  pyesasi  1980-yili  Respublika 
Yosh tomoshabinlar teatrida qo’yilgan. Shundan so’nggi yillarda o’ndan ortiq pyesa yozdi 
va  ular  poytaxt  hamda  qator  viloyat  teatrlari  repertuariga  kiritildi.  Shulardan  uchtasi 
«To’maris»  (1990,  rejissor  R. Hamidov),  «Fig’on»  (1992,  rejissor  M. Azimov),  «Hayot 
eshik  ortida»  (rejissor  Yo.  Sa’diyev)  «Milliy»  akademik  drama  teatrida  qo’yilgan. 
«Sohibqiron  Temur»  (Buxoro),  «Tunda  uchgan  turnalar»  (Andijon),  «Kalavaning  uchi 
kampirda»  (Jizzax),  «Dod,  xotinlar  dastidan»,  «Uyingizga  sovchi  keldi»  asarlari  qator 
viloyat  teatrlarida  sahnalashtirilgan.  «Qor  bobo  va  qor  momo»,  «O’rmon  mashmashasi», 
«Ertaklar o’lkasi» pyesalari Yosh tomoshabinlar teatridan o’rin olgan. «Yettinchi falakdan 
kelgan  ovoz»  (rejissor  Sh. Junaydullayev)  va  «Chorraha»  (rejissyor  M. Mirzaahmedov) 
asarlari asosida ko’p seriyali telefilmlar yaratilgan. 
S. Sirojiddinov  gazeta  va  jurnallarda  T. Ro’ziyeva,  S. Zohidova,  M. Azimov,  R. 
Ibrohimova, M. Hamidov, B. Mamatxonov kabi san’atkorlar haqida maqolalar e’lon qilgan.