Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
33
Shu vaqt tag‘in birov keladi. 
— Nima gap, Hamzaev? — deydi. 
— Manavi valdirvasar bo‘lib ketib borayapti. 
— Shabko‘rdir-da. 
Ovozlarni tanib olaman — birovi Jug‘rofiya bo‘ladi, birovi Adabiyot bo‘ladi. 
Jug‘rofiya o‘ng qo‘limdan olib keladi, Adabiyot chap qo‘limdan olib keladi. 
Yotoqda bolalar pish-pish qotadi. 
16 
G‘o‘zapoya Ziyod yelkalarida tars-tars etadi. G‘o‘zapoya ko‘k ko‘saklari uchib-uchib tushadi. 
G‘o‘zapoyada bitta-da ko‘sak qolmaydi. 
— Sattorov! — deydi direktorimiz. — Boring, boshqa g‘o‘zapoya olib keling! 
Adabiyot chopqillab tashqarilaydi. Bir g‘o‘zapoya tarashlab keladi. 
G‘o‘zani uchlari ko‘saksiz bo‘ladi. 
— Men qoqcho‘p bilan chilik o‘ynaymanmi?! Boring, ko‘saklisidan olib keling! 
Direktorimiz shunday deya, g‘o‘zapoyani tashqari otadi. 
Adabiyot shoda ko‘sak g‘o‘zapoya olib keladi. 
— Endi, oshpazni aytib keling! 
Adabiyot o‘ninchi sinf qizni ergashtirib keladi. Direktorimiz oshpaz qizga ro‘yxat uzatadi. 
— Elomonova! — deydi. — Ertadan boshlab manavi tekintomoqlarga go‘shtsiz ovqat berasan! 
Agar ushoqday go‘sht bersang — kuningni ko‘rasan! 
Shu-shu — kosam go‘sht ko‘rmaydi. 
17 
Jiva qoshig‘imni yo‘qotib qo‘yaman, 
Oshpaz qizdan qoshiq so‘rayin deyman — direktorimizga aytadi, deya qo‘rqaman. 
Shu bois, Nuralini kosasiga qo‘shilaman. 
Ziyod bilan Meliyam qo‘shiladi — ular-da qoshiq yo‘qotadi. 
To‘rtovora bir kosa bo‘lamiz. 
Qoshiq Nuralidan boshlab aylanadi. 
Nurali ikkov ichadi — Meliga qoshiq tashlaydi. Meli ikkov ichadi — Ziyodga qoshiq tashlaydi. 
Ziyod ikkov ichadi — menga qoshiq tashlaydi. 
Gir-gir aylanmish qoshiqdan ko‘z ayirmay turaman. 
Uchov ichuvchi bo‘lsa — darrov bilagidan qo‘shqo‘llab ushlayman. Qo‘lidan qoshiqni yulib 
olaman. 
— Uchov ichding, uchov! — deyman. 
18
Ichim burab-burab qoladi. Ichim qabz etib-qabz etib qoladi. 
Dardim ichimda bo‘ladi. 
Kundan-kun darmondan qolaman. 
Maktab futbol maydoni badrabxonamiz bo‘ladi. 
Kallai saharlab futbol maydoniga chopqillayman. Maydon duch kelmish yerida o‘tira qolaman. 
Tevarak-boshimga uyqusirab-uyqusirab alanglayman. 
Tevaragimda oyoq bosar yer juda-juda kam bo‘ladi. 

---

Tog‘ay Murod. Otamdan qolgan dalalar (roman)