Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
121
— Sengami, senga bir nima olib keldim! Qani, qo‘lingni ber. Ana, ko‘rdingmi? 
Bir-ikkita maydapista chaqib ko‘rsatdim. 
— Ana shunday chaq! — dedim. — Qirsillatib-qirsillatib chaq, tishing baquvvat bo‘ladi! Qani, 
baring qo‘lingni tut! 
Bolalarga maydapista bo‘lib berdim. 
— Ana endi, borib o‘ynanglar! — dedim. — Boringlar! 
Bolalar tarqaldi. 
Faqat Qulmat o‘g‘limiz qoldi. 
Kambag‘alga ket, deyolmadim — ko‘nglim bormadi. 
Qambag‘al Qulmat — dardmand! 
Do‘xtir ko‘rib, vitamin yetishmaydi, dedi. Bir dasta dori bitib berdi. 
Denov dorixonasidagilar bitiklarni ko‘rdi-ko‘rdi — bittasiyam yo‘q, lekin bo‘p turadi, tez-tez xabar 
olib turing, dedi. 
Men aytdim: vitamin g‘o‘za edimidiki — tez-tez xabar olib turaman, dedim. 
Tag‘in qaytib bormadim. 
Dardmand Qulmatimiz ingilladi:
— Ota, pomidor bering! — dedi. 
Men hayronlandim — to‘rxaltada pomidor yo‘q bo‘ldi. 
— Pomidor? Qani pomidor? — dedim. Qulmatimiz qo‘li bilan xurmoni ko‘rsatdi. E, tavba-e, 
o‘g‘limiz xurmoni tanimadi! 
E, tavbangdan-e, o‘g‘limiz xurmoni taniyolmadi! Men palag‘daroq bir xurmo olib berdim. 
— Ma, bu pomidor emas, — dedim. — Bu xurmo, ha, xurmo! 
Derazadan Denov tarafni ko‘rsatdim. 
— Hay, anavi quyuq daraxtzor bor-ku, ana shu subtropik bog‘, — dedim. — Subtropik bog‘da 
xurmo o‘sadi, bizni dalada g‘o‘za o‘sadi! 
Oshxona zanjirlab tashqariladim. 
Og‘ilxona aylanib qaradim. 
O‘zi, bisotimda uchovgina qo‘yim bo‘ldi. Ikkovi sovliq bo‘ldi. Birovi so‘yib sotish uchun boqilib 
yotmish qo‘y bo‘ldi. 
Ana shu qo‘y maskovchilarga nasib etajak bo‘ldi. 
Men maskovchi mehmonlarga so‘yilajak qo‘yimni qaradim. Dumbasini changallab-changallab 
qaradim. 
Qo‘yim oriq bo‘ldi, so‘yishga arzigich go‘sht qilmagich bo‘ldi.