Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
126
— O‘shanda shunday o‘qitadimi? 
— Ha, endi... VGIKni bityrgan-da, VGIKni. 
24 
Men dala boshida turmish to‘rt qatorli mashinani egat soldim. Rejissyorga qaratib haydadim. 
Apparatlar men taraf peshlandi. 
— Do‘stlar! — deya peshvoz yurdi Jingalasoch. — Keling, avvalo o‘tmishga bir sayohat qilaylik! 
Jingalasoch shunday deya, bir oppoq chanoq uzib oldi. Peshonasi uzra ko‘z-ko‘z etdi. Chanoq 
tikilib-chanoq tikilib va’z aytdi: 
— Paxta! Paxta malvovlar oilasiga mansub bo‘lib, gossipiumlar ajdodidandir! Gossipium — 
lotincha so‘z bo‘lib, paxta beruvchi daraxt demakdir! 1670 yilda podsho Aleksey Mixaylovichning 
buyrug‘iga binoan Moskva shahrida ham paxta ekildi. Uni saroy bog‘boni Anosov ekdi. Moskvada 
Izmaylov madaniyat va istirohat bog‘i bor. Ana shu xushmanzara yerda paxta dalasi barpo bo‘ldi. 
Izmaylov dalasi yaxshi hosil berdi! Mamlakatimizning Odessa va Xerson o‘lkalarida ham Amerika 
«si-aylend» paxtasi ekildi. Hosildor paxta bo‘ldi. U yerliklar paxtani bir terib oldi. Uch kundan keyin... 
tag‘in ochilib turdi! Kuz oxirlagunicha ochildi! Oxiri — u yerlik mahalliy xalq paxtadan kechishga 
qaror qildi. Bizga hosilini bir terib oladigan o‘simlik kerak, dedilar. Unday paxta esa yo‘q edi! U 
yerliklar paxta mashaqqatiga, paxta azobiga... bardosh berolmadi! Ammo jafokash o‘zbek xalqi, 
jafokash o‘zbek yeri bardosh berdi! O‘zbek xalqi, o‘zbek tuprog‘i umrini paxtaga baxshida etdi. Qish 
demadi, yoz demadi — paxta, dedi. Tun demadi, kun demadi — paxta dedi. Shundaymi, Dehqonqul 
aka? 
Jingalasoch mikrofonini cho‘zdi. Men mashinadan mikrofon enkaydim. 
— Ha, shunday, — dedim. — Bizning «paxtaoy» pichagina nozikta’b, bizning «oq oltin» 
pichagina kuydirmajon! 
— Kechirasiz, hol-ahvol ham so‘ramabmiz, bu... ish qalay? 
— Muvaffaqiyatli! 
— Ish sharoitlaringiz qalay? 
— Qulay! 
— Bo‘sh vaqtlaringizda qanday dam olmoqdasiz? 
— Ko‘ngildagiday! 
— Qanaqa dam olmoqdasiz? 
— Madaniy! 
— Ish jarayonida ahyon-ahyonda uchrab turadigan qiyinchiliklarni qanday yengmoqdasiz? 
— Mardonavor! 
— Hali-hamon ko‘zga tashlanib turadigan kamchiliklarni qanday bartaraf etmoqdasiz? 
— Ayovsiz! 
— Bu yilgi rejalaringiz qanday? 
— Yuksak! 
— Dono partiyamiz belgilab bergan yo‘l-yo‘riqlarga qanday amal qilmoqdasiz? 
— Og‘ishmay! 
Rejissyor chapak chalib yubordi. 
— Bravo, bravo! — dedi. — Vot, sovetskiy dehqon! 
25 
Osmonda pag‘a-pag‘a oq bulut suzdi. 
Kun bulut ortida qoldi. 

---

Tog‘ay Murod. Otamdan qolgan dalalar (roman)