Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
112
Bolalarim ko‘z o‘ngimga keldi. Ko‘nglim buzildi. 
— Ishqilib, bolalarimni peshonasiga yaxshi bo‘p ketsa bo‘ldi... — dedim. 
Men kaftlarimga yig‘ladim. 
Dardlarim kaftlarimdan seloba-seloba bo‘lib oqdi. 
— Otday bo‘lib ketadi! — dedi do‘xtir. — Oltmish foiz kuyik unday qaltis emas... 
Do‘xtir yelkam qoqa-qoqa ketdi. Men o‘ngirlarimga yig‘ladim. 
21 
Ayolimiz... odam bo‘lmadi... 
 
22
Subhi sodiqda ayolimiz boshiga bordim. Mozor poyida tizza bo‘ldim. 
Mozorni ohista-ohista turtdim — ayolimizni uyg‘otdim... 
— Ay, men keldim? — dedim. 
Bir siqim mozor oldim — ayolimiz sochlarini ushladim... 
— Ay, senga aytaman? — dedim. Tomog‘im to‘lib-to‘lib keldi... 
23
Uy burchida turmish beshikbellik ko‘zimg‘a yomon-yomon ko‘rindi. 
Men endi beshikni nima qilayin? Men endi beshikka o‘zimni belayinmi? 
Men beshik qarab turdim-turdim. 
Shunda beshik... shunda beshik ayolimiz tobuti bo‘lib ko‘rindi! 
Ichida... ayolimiz yotmishday bo‘ldi! Badanlari oltmish foiz kuyib-kuyib yotmishday bo‘ldi! 
Ayolimiz pichir-pichir meni yo‘qlamishday bo‘ldi! 
— Ha, nima deysan? — dedim. Beshikdan javob bo‘lmadi. 
— Ayt, aytgichingni? — dedim. 
Beshik — tobut desa tobut deguday sukut etdi. 
Men ohista-ohista beshik oldilab bordim. Enkayib qo‘llarimni tizzalarim tiradim. O‘ng qulog‘imni 
beshik tutdim. 
Beshikdan ovoz bo‘lmadi. 
Beshikyopg‘ich burchidan ohista ushladim. Xiyol-xiyol ko‘tardim. Beshik ichi mo‘raladim. 
Beshikda jon zoti bo‘lmadi. 
Beshik ko‘zimga yomondan-yomon ko‘rindi. 
Beshikni ko‘rmayin-da, kuymayin-da, dedim, 
Beshikni dast ko‘tarib tashqariladim. 
Narvondan beshik qo‘ltiqlab tomladim. Beshikni g‘o‘zapoya uyumi usti tashladim. 
Beshik g‘o‘zapoya botib-g‘o‘zapoya botib qoldi. 
Shunda, beshikyopg‘ich shamolda hilp-hilp etdi. Hilp-hilp eta-eta beshik ketilab uchib tushdi. 
Beshikyopg‘ich bir uchi beshikqushda ilashib-beshikqushda ilashib qoldi. 
Bovujud, beshikqush borlik bo‘ldi — beshikyopg‘ich yer uchib tusharman-er uchib tusharman 
bo‘ldi. 
Men beshikdan qovuzni oldim. Oqo‘ragichni oldim. Tagpo‘shni oldim. 
Sumakni oldim. Tuvakni oldim. 
Barini beshikyopg‘ich soldim. 
Shunda, dimog‘im gup-gup shiptir isi tuydi. 

---

Tog‘ay Murod. Otamdan qolgan dalalar (roman)