Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
127
Dalalar xira tortdi. 
Kinochilar kun angnidi. 
Jingalasoch Xursandoy bilan Norguloyga «Paxta ishqi» degich qo‘shiq mashq ettirdi. 
Kun bulutlar ortidan chiqib keldi. 
Dalalar kunday yorug‘ bo‘ldi. 
O‘qariq bo‘yida ayol-qizlar saflandi. Etak boylab terim shaylandi. 
Ideologiya ayol-qizlarni bir-bir ko‘zdan kechirdi. Ma’qul, deya bosh irg‘adi. 
Rejissyor besh-olti odim berida turdi. Oyoq kerdi. Qo‘llarini bel tiradi. 
Rejissyor tishlari orasidan chirt-chirt tupurdi. Tupugi o‘zi bilan terimchilar o‘rtasi borib tushdi. 
Rejissyor bir yonidan papiros oldi, bir yonidan gugurt oldi. Terimchilardan ko‘z uzmay papiros 
ezg‘iladi. Chirsillatib gugurt chiqdi. Bo‘yin qiyshaytirib papiros tutatdi. Gugurtcho‘pni yelkasi osha 
otdi. 
Yuragim shuvv etdi. 
Gugurtcho‘p tushmish yer hadahalab bordim. Gugurt-cho‘pni bosib-bosib tashladim. 
«Katta, dalada papiros chekmaydi — paxta o‘t olib ketadi», deyin-deyin dedim. 
Bir Ideologiya qaradim, bir raisimiz qaradim. 
Rais bilan Ideologiya bilib-bilmaslikka oldi. 
Rejissyor burqsitib-burqsitib papiros tutatdi. 
Rejissyor tutunlar orasidan ayol-qizlar qaradi. Papirosini labi u burchidan-bu burchi surib qaradi. 
Lablarini do‘rdaytirib-do‘rdaytirib qaradi. 
Rejissyor misoli kuchuk imlamishday — shahodat barmog‘ini likillata Jingalasoch chaqirdi. 
Jingalasoch lik-lik eta keldi. Rejissyor girdida yelpatak-elpatak bo‘ldi. 
Rejissyor kaftini kosa etib-etib gapirdi. Qo‘lini bigiz etib-etib gapirdi, barmog‘ini peshonasi nuqib-
nuqib gapirdi. 
Jingalasoch bosh irg‘ab-bosh irg‘ab eshitdi. Bosh irg‘ay-irg‘ay terimchilar oldilab keldi. 
Xursandoy bilan Norguloyga boshdan-oyoq razm soldi. 
Terimchilar iymanib yer qaradi. Ro‘moli uchini qayirdi. Ro‘molini peshonalari surdi. Ter 
yaltiramish bo‘yinlari bilan yoriq-yoriq lablarini yashirdi. 
Terimchilar ko‘ylak etaklarini tortib-tortib qo‘ydi. 
— Bo‘lmaydi! — dedi Jingalasoch. — Bu atlas bo‘lmaydi! 
— Yaxshi atlas-ku, —dedi Ideologiya. 
— Yaxshi, yomon emas, yaxshi! Ammo bu sariq atlas-da. Sariq atlas ekranda sap-sariq chitga 
o‘xshab ko‘rinadi. Chunki lentamiz rangli lenta-da. 
— Unda, qanday atlas yaxshi bo‘ladi? 
— Juhudi atlas yaxshi bo‘ladi! Ekranda turli rangda tovlanib ko‘rinadi. Juhudi atlas rang-barang-
da. 
— Yevreyskiy atlaslaringiz bormi, Xursandoy va Norguloy? — dedi Ideologiya. 
Terimchilar yerdan ko‘z olmadi. Kalishi uchi bilan yer titkiladi. Bosh irg‘adi — yo‘q ishorasini 
bildirdi. 
— O‘zlarida bo‘lmasa, boshqalarda bordir? — dedi Jingalasoch. — Shunday katta kolxozda juhudi 
atlas topilmaydimi? 
— Yevreyskiy atlas topish qiyin. Bu atlas ham yaxshi-ku? — dedi Ideologiya. 
— To‘g‘ri, yaxshi atlas. Ammo gap boshqa yoqda. Bilasiz, filmimiz Ittifoqqa chiqadi, Ittifoqqa! 
Undan chet ellarga! Filmimizni butun jahon ko‘radi, butun jahon! Ekranda sap-sariq chit ko‘ylakni 
ko‘rganlar nima deydi? Qaranglar, bechora o‘zbek sovet xotin-qizlari chit ko‘ylak kiyib paxta 
terayapti, demaydimi? Deydi! O‘zbek sovet xotin-qizlari kiygani kiyimga zor ekan, demaydimi? 
Deydi! Ideologiya aftodahol-aftodahol bo‘ldi. 
— Vinovat, vinovat... — dedi. 

---

Tog‘ay Murod. Otamdan qolgan dalalar (roman)