|
www.ziyouz.com kutubxonasi
5
ekan.
— O’zim ichmayman, lekin boshqalarni ichkilik bilan mehmon qilishni juda yoqtiraman, bildiz? —
deb tushuntirdi u. — Mana, Bebi1 juda yaxshi ko‘radi shampan sharobini, shuning uchun ancha
qiynalib bo‘lsa ham, uch shisha shampan topib keldim.
U Bebi deb Jamilani aytayotgan edi.
Mo‘ltoniy shampan vinosini qanday qiynalib topgani haqida butun ikir-chikirlari bilan mufassal
hisobot berdi, so‘ng o‘zining bir marta Adan qirg‘og‘ida sal bo‘lmasa kemadan qolib ketayozgani
to‘g‘risida rosa rezinka qilib cho‘zib hikoya qilib ketdi. Bu nihoyatda zerikarli odmi bir voqea edi.
Mo‘ltoniy bu “sarguzasht”ini so‘zlab bo‘lib, o‘zining bosh mexanik bilan nizolashib qolgani haqida
gapira boshladi. Ular nega kelisha olishmabdi? Bu murosasizlik qanday yuz beribdi? Mo‘ltoniyning
hikoyasi boshdan-oyoq texnikaviy tafsilot va atamalardan iborat edi, unda “klapan”, “tsilindr”,
“qozon”, “bug‘ bosimi” va hattoki “gravitatsiya” kabi so‘zlar shu qadar g‘ij-g‘ij ediki, Ishoq, endi o‘la-
o‘lgunimcha kema mexanizmlarini yomon ko‘rib qolsam kerak, deb o‘yladi. Mo‘ltoniy esa, hikoya
qilishda davom etarkan, qadahdagi suvini ho‘plab-ho‘plab qo‘yar va ikki gapning birida o‘sha “bildiz”ni
qo‘shib qo‘yardiki, oxir-oqibatda Ishoq oliy nav shotland viskisi emas, balki ovqatni hazm qildiradigan
ma’danli suv ichayotganday his qildi o‘zini. Mo‘ltoniyning “bildiz” so‘zidan jirkangan Ishoqning nafasi
qaytib, ko‘ngli ayniy boshladi. Lekin, baxtiga, shu asnoda Mo‘ltoniy unga osma karavotga chiqib
o‘tirishni tavsiya qilib qoldi. Ishoq karavotga chiqib o‘tirib, oyoqlarini osiltirdi va atrofga ko‘z
yugurtirdi: uning o‘ng tomonida, osma karavot balandligida illyuminator bo‘lib, uning tashqarisida
yo‘g‘on bir arqon xuddi dorga ilingan sirtmoqdek tebranib turardi. Chap tomondagi ko‘zguda esa, u
pastda, divanda siqilishib o‘tirgan qizlar aksini ko‘rdiki, ayni shu manzara yuragi ziq bo‘lgan Ishoqning
“dod!” deb yuborishdan asrab qolgan yagona yupanchiq bo‘ldi.
* * *
Agar bir ko‘rganda oshiq bo‘lib qolish rost bo‘lsa, Ishoq eng avval Jamilani emas, Shakuntalani
birinchi marta ko‘rganidayoq yoqtirib qolgandi. Vazmin tabiat va bama’ni chehrali, kamsuxan,
tabassumi sipo, baland bo‘yli, sarvqomat Shakuntala Ishoqning ko‘ziga ma’suma va maftunkor qiz
bo‘lib ko‘ringandi. Sanjanadagi noz-karashmali suyuq qiliqlardan unda asar ham yo‘q edi.
Sanjana ulfatlarni gurungga tortishga, ularni kuldirishga jon-jahd bilan urinardi. U Mo‘ltoniy aytgan
biron gapni ilib olardi-da, uning so‘zini bo‘lib, o‘z kechmishlarini hikoya qilishga shaylanardi, biroq
Mo‘ltoniy o‘zgalar gapini eshitadiganlardan emas edi! U hech bir odamning gapiga quloq solmay,
ming‘irlagancha hikoyasini davom ettiraverardi...
Ikki soatlardan keyin kayuta papiros tutunidan shu qadar dimiqib ketdiki, natijada Jamila:
— Kelinglar, ochiq havoga chiqaylik! — deb iltijo qildi. — Bu yerda nafas olib bo‘lmay qoldi!
— Mayli, chiqamiz! — dedi Mo‘ltoniy uni qo‘llab. — Bebining nafasi qaytib ketdi bu yerda.
Ishoq osma karavotdan sakrab tushdi, Mo‘ltoniy eshikni ochdi, hammalari palubaga chiqishdi. Shu
payt bosh mexanik o‘z kayutasi eshigidan mo‘ralab, qizlarni zimdan kuzata boshladi. Qizlar bosh
mexanik kayutasi yonidan o‘tayotganlarida ham, bort chetidagi tutqichga suyanib turganlarida ham
o‘zlarining zimdan kuzatayotganliklarini unutmagan edilar. Ular go‘yo biron noxushlik yuz berishidan
cho‘chiyotganday, dam-badam nuqul sarilarini tekislashardiki, bu holni ko‘rgan Ishoqning nazarida,
qizlarning ensalarida ham ko‘zlari bor edi go‘yo.
Qizlar yuqori palubada, katta-katta ventilyatsiya quvurlari yaqinida turishardi; bu quvurlar mashina
bo‘limidagi aynigan havoni so‘rib olish va u yerga toza havo yuborish uchun xizmat qilardi.
Ventilyatorlar muntazam guvillab turardi.
Bosh mexanik o‘z kayutasida patefoniga plastinka qo‘ydi. Vals kuyini eshitgan Sanjana shu zahoti
sabri chidamay, baland poshnalarini temir to‘shamali palubaga do‘q-do‘q urgancha raqs tusha ketdi.
Uning bu qilig‘i Mo‘ltoniyning g‘ashiga tegdi va bu yerdan ketishni taklif qilmoqchi bo‘ldi. Lekin
qayoqqa? Kayuta havosi hali tozalanmagan edi.
Musaffo osmon (qissa). Krishan Chandar
Do'stlaringiz bilan baham: |
