Mavzu: Sportchini tayyorlashning ilmiy nazariy taxlili. Reja

Mikrosikllar tuzilmasi. Tabiiyki, musobaqa davridagi mikrosikllarning asosiy shakli yuqorida aytib o‘tilgan musobaqa mikrosikli bo‘ladi. Biroq bu yerda barcha mikrosikllar bir xil emas. Asosiy musobaqalar o‘tadigan kunlarni o‘z ichiga olgan mikrosikllar haftalik yuklama hajmining kamayishi va mashgulotlarning eng kam miqdori bilan xarakterlanadi. Ko‘pincha musobaqalar haftasiga 2-3 kun, ba’zan esa undan ham ko‘p kun hajmi kattaroq yuklamalardan xoli qilinadi. Bu vaqt, asosan, musobaqa boshlanadigan paytgacha tiklash va «o‘ta tiklash» samarali bo‘lsin uchun, faol dam olish va hajmi uncha katta bo‘lmagan chigal yozish (razminka) mashqi uchun ajratiladi.

Musobaqa oldidan qatorasiga bir necha kun to‘liq dam olish, odatda, maqsadga muvofiq, deb hisoblanmaydi. Malakali sportchilar, agar ular har kungi mashqga odatlanib qolgan bo‘lsalar, mashg‘ulotlarni, umuman, to‘xtatmasliklari mumkin, lekin keyingi kunlardagi bunday mashg‘ulotlar yaqinlashtiruvchi xarakterda o‘tkazilishi kerak.

Yuklamalarning haftalik hajmi oshirilgan mikrosikllarda (ayniqsa, oraliq bosqichlarda) mashq kunlarining o‘zi ko‘payishi bilan xarakterlanadi. Shunga yarasha yuklamalar va dam olish rejimi ham ancha tig‘iz bo‘ladi. Shu bilan birga eng ko‘p kuch-g‘ayrat talab qiladigan musobaqalar yoki oshirilgan mashq yuklamali mikrosikllar ketidan keladigan yuklamani tashlash mikrosikllaridan ham foydalaniladi. Yuklamani tashlash mikrosikllarda taxminan 3 kundan 5 kungacha vaqt, asosan, xilma-xil mashqlarga o‘tish va mashg‘ulot sharoitini o‘zgartirish yo‘li bilan ta’min etiladigan faol dam olishga ajratiladi.