Мавзу: Кириш

Валюта конвертацияси деганда унинг бошқа валюталарга алмаша олиш хусусияти тушунилади. У ёки бу валютанинг конвертацияланиш даражаси мазкур валюта расмий пул бирлиги бўлган мамлакатнинг иқтисодий қудрати ва барқарорлигига, шунингдек, мамлакатда белгиланган валюта алмаштириш тартибига боғлиқ. Валюталар конвертацияланиш даражасига қараб қуйидагича таснифланади:
Тўла-тўкис яъни эркин конвртацияланадиган валюталар бошқа валюталарга ҳеч қандай чеклашларсиз алмаштирилади. Бундай валюталар жаҳоннинг деярли барча мамлакатларида юксак даражада қадрланади ва қабул қилинади. Улар қаторига АҚШ доллари, ЕВРО, Англия фунт стерлинги, Япония иенаси ва бошқалар киради. Бундай валюталар одатда «кучли», «қаттиқ» валюталар дейилади.
Қисман конвертацияланадиган валюталар расмий пул бирлиги бўлган мамлакатларда валюта алмаштириш, уни сотиш ва сотиб олиш, мамлакатга хорижий валютани олиб кириш ва ундан олиб чиқиш каби операциялар чегараланган бўлади. Бундай валюталар қаторига жаҳондаги жуда кўп мамлакатларнинг, шу жумладан, собиқ социалистик мамлакатлар валюталари ҳам киради.
Қисман конвертацияланадиган валюталар фақат мамлакат ичкарисида ёки ундан ташқарида ҳам алмаштирилиши мумкин. Ана шу сабабли валюталар ички ва ташқи конвертацияси тушунчалари мавжуд.
Конвертацияланмайдиган валюталар фақат бир мамлакат ичкарисида муомалада бўлади, бошқа валюталарга алмаштирилмайди. Мамлакатга хорижий валютани олиб кириш ва уни олиб чиқиш қатъий чегараланган бўлади. Одатда бундай валюталар амалда бўлган мамлакатлар иқтисодиёти қолоқ, экспорт имкониятлари эса заиф бўлади. Бундай мамлакатларнинг валюта захиралари жуда оз бўлиб, миллий валютани конвертациялашга етишмайди.


2.2. Валюта муносабатлари тушунчаси валюта курси ва котировкаси.
Аввал кўриб чиққанимиздек, халқаро иқтисодий алоқалар натижасида мамлакатлар ўртасида валюта муносабатлари келиб чиқади. Маълумки, ҳар бир мамлакат ўзининг миллий пул бирлигига эга бўлади. Бир мамлакат бошқа мамлакатдан товарлар сотиб олиши ёки хизматларидан фойдаланиши керак бўлса, аввало ўша мамлакатнинг пул бирлигидаги маблаққа эга бўлиши лозим.
Масалан, Ўзбекистон Япониядан товарлар сотиб олмоқчи бўлса, унда япон иенасидаги маблағлар бўлиши керак. Ғарбий Европа мамлакатларидан товарлар сотиб олмоқчи ёки уларнинг хизматларидан фойдаланмоқчи бўлсак, мамлакатимизда ЕВРО пул бирлигидаги маблағ бўлиши лозим.
Мамлакат зарур бўлган хорижий валютага эга бўлиш учун чет мамлакатларга товарлар чиқариб сотиши (экспорт) ёки ўз пулига хорижий валютани сотиб олиши лозим.
Бир миллий валютани бошқа миллий валютага айирбошлаш валюта муносабатлари дейилади. Бир миллий валюта бошқасига валюта курси асосида айирбошланади. Бир мамлакат миллий валютасининг бошқа мамлакат миллий валютасида ифодаланган баҳоси валюта курси дейилади.
Миллий валюталар бир-бирига ана шу валюта курси асосида алмаштирилади.
Ҳозирда аксарият мамлакатларнинг Марказий ёки Миллий банклари томонидан мунтазам равишда ўз миллий валюталарини бошқа валюталарга нисбатан курсини аниқлаб борилади. У ёки бу мамлакатнинг миллий валютаси курсини аниқлаш учун ўша валютанинг ҳарид қобилияти аниқланади. Бунинг учун шу мамлакатдаги 1100 тадан 1300 тагача товарлар ва хизматлар баҳоси таққослаб кўрилади. Олинган натижалар асосида миллий валюта курси аниқланади.
Ўзбекистон Республикаси Марказий банки миллий валютамиз-сўмнинг хорижий валюталарга нисбатан расмий курсини аниқлайди ва оммавий ахборот воситалари орқали эълон қилади. Масалан, Ўзбекистон Республикаси Марказий банки маълум қилишича, миллий валютамиз - сўмнинг 2011 йил 17 майидан бошлаб қиймати қуйидагича белгиланди:
1 Австралия доллари - 1792,14 сўм
1 Англия фунт стерлинги - 2749,65 сўм
1 АҚШ доллари - 1699,52 сўм
1 Канада доллари - 1753,71 сўм
1 СДР - 2710,29 сўм
1 ЕВРО - 2428,53 сўм
1 Швецария франки - 1904,86 сўм
10 Япония иенаси - 210,08 сўм
10 Жанубий Корея вони - 15,55 сўм
1000 Туркия лираси - 1064,40 сўм
1 Россия рубли - 61,02 сўм
......
*) Валюта қийматини белгилаш чоғида Ўзбекистон Республикаси Марказий банки мазкур валюталарни ушбу қийматини сотиш ёки сотиб олиш мажбуриятини олмаган.
Валюта курсини белгилаш ва валюта алмаштириш нисбатларини аниқлаш валюта котировкаси дейилади. Валюта котировкаси тўғри ва тескари усулларда амалга оширилади.
Тўғри котировкада хорижий валюта бирлиги курси миллий валютада ифодаланади, масалан:
1 АҚШ доллари = 1699,92 сўм
Тескари котировкада миллий валюта бирлиги курси хорижий валютада ифодаланади, масалан :
1 сўм = 0,00058826297 АҚШ доллари
Бугунги кунда Ўзбекистонда 3 та асосий - расмий, тижорат ва параллел (чайқов бозор) валюта айирбошлаш курслари амал қилмокда.
Кўриб чиққанимиздек, расмий валюта курси Марказий банк томонидан аниқланади ва бухгалтерия ҳисоби, статистик ва бошқа ҳисоботларни юритиш, шунингдек божхона ва бошқа мажбурий тўловларни тўлашда фойдаланилади.
Тижорат валюта курси тижорат банклари томонидан ички бозордаги хорижий валютага бўлган талаб ва таклифни ҳисобга олган ҳолда аниқланади. Тижорат валюта курслари бўйича тижорат банклари ҳуқуқий ва жисмоний шахслардан хорижий валютани сотиб олади ва сотади. Масалан, Ташқий иқтисодий фаолият Миллий банк 2011 йил 23 ноябрдаги тижорат курси бўйича 1 АҚШ долларининг сотиб олиш курси 1788, сотиш курси эса 1793 сўмни ташкил этди.
Паралел, яъни чайқов бозор валюта курси. Норасмий равишда фуқаролар ўртасида хорижий валюта олди-сотдисида қўлланилади. Унга кўра 2011 йил 16 ноябрда 1 АҚШ долларининг сотиб олиш курси 2700 сўмни, сотиш курси эса 2710 сўмни ташкил этди
Тижорат банклари амалиётида ва чайқов бозорида хорижий валютани сотиб олиш ва сотиш курси қўлланилади, яъни арзонроқ сотиб олинади ва қимматроқ сотилади. Фарқи эса воситачилик ҳақи ҳисобланади.