Matnning lingvopoetik tahlili

6 “Matnning lingvopoetik tahlili”fanining maqsadi nima?

“ Matnning lingvopoetik tahlili” fanining maqsadi: talabalarning umumfilologik saviyasini ko‘tarish va mustahkamlash. Talabalarga lisoniy tahlil haqidagi tasavvurga ega bo‘lishlarini, lisoniy tahlilning (fonetik, leksik, morfologik va sintaktik) qatlamlaridan xabardor bo‘lgan holda, mumtoz va hozirgi zamon shoir va yozuvchilarimiz badiiy asarlari tilini o‘rgatish. Talabalarning tilshunoslik va adabiyotshunoslikdan olgan bilimlarini yangi ilmiy va metodologik bosqichga ko‘tarish, o‘zbek tilining chiroyi, estetik jilosini anglash, nutq madaniyatini takomillashtirish va istagan badiiy matnni sharhlash malakasini hosil qilishdir.

7. “Matnning lingvopoetik tahlili” fanining vazifalari?

"Matnning lingvopoetik tahlili” fanining vazifalari: talabalarni matn va uning tiplari, badiiy matn va uning qismlarini bog‘lovchi vositalar, badiiy nutq uslubi va uning ko‘rinishlari, badiiy matnning fonetik-fonologik, leksik-grammatik xususiyatlari, ko‘chimlar hamda badiiy matnni tadqiq etish tamoyillari bilan tanishtirish hamda mazkur kurs bo‘yicha olgan nazariy bilimlarini badiiy asarlardan tanlangan matnlar tahlilida sinab ko‘rish. 

8. Lingvopoetik tahlilni ta’riflang.

Lingvopoetik tahlil - til, nutq birliklarini uni tashkil etuvchi qismlari, mazmuni, vazifasi va boshqa xususiyatlari nuqtai nazaridan tadqiq etish, til (nutq) birliklarining aniq holatini belgilash. 

9. “Matnning lingvopoetik tahlili” fani qaysi bo‘limlar bilan o‘zaro aloqada?

Mazkur kursning mazmuni tilshunoslik, adabiyotshunoslik, matnshunoslik, nutq madaniyati, uslubshunoslik, falsafa, etika, estetika, mantiq va psixologiya kabi bo'limlar bilan uzviy aloqadorlikda faoliyat yuritadi. Badiiy matnni lisoniy tahlil qilish talabadan jiddiy filologik tayyorgarlikni talab qiladi. Chunki badiiy matn ijodiy tafakkur mahsuli sifatida shakl va mazmun jihatidan o’ta murakkab badiiy estetik butunlik hisoblanadi.