Materialshunoslikning fundamental asoslari. Konstruksion materiallar texnologiyasi

Shtamplash texnologiyasi

Shtamplash - usublida buyumlar maxsus qoliplar-shtamplarda shakllantiriladi va u bolg’alashga qaraganda ish unumining yuqoriligi, mahsulot o’lchamlarining aniqligi, yuzaning tekisligi, murakkab shaklli mahsulotlar olinishi, yuqori malakali ishchilarni talab qilmasligi bilan ajralib turadi. Lekin shtamplashning qimmatligi, mahsulot massasining cheklanganligi (<250-300kg) va kam seriyalik mahsulotlar uchun yaroqsizligi kabi kamchiliklarga ham ega.

Shtamplashning quyidagi turlari mavjud:

1. Issiq hajmiy shtamplash asosan ommaviy mahsulotlarni(pokovka) ko’plab ishlab chiqarishda qo’llanilib shakl va o’lchamlarning yuqori darajada aniqligini taminlaydi, metallni kerakli bo’laklarga bo’lish, bo’laklarni qizdirish, shtamplash, termik ishlov berish va pardozlash jarayonlaridan tashkil topadi. Bu usuldan qiyin deformatsiyalanadigan qotishmalardan buyumlar va detallar yasashda foydalaniladi.

2. Sovuq holda hajmiy shtamplash yumshoq metallardan kichik o’lchamli detallar olishda ishlatilib, unda chiqindi kamayadi, mahsulot sirtining sifati ortadi, juda aniq o’lchamli va shaklli buyumlar olish mumkin bo’ladi.