Матеьатик лингвистика нима?

169. Давлат тили хакидаги конун
Оʻзбекистон Республикасининг давлат тили ҳақида"ги қонун қабул қилинди (1989-йил 21 окт.). Бу қонун оʻзбек халқи миллий онгининг ривожланишида, мамлакат мустақиллиги мустаҳкамланишида, маданий мероснинг тикланишида муҳим рол оʻйнади. Мазкур қонун қоидалари Оʻзбекистон Конституциясида мустаҳкамлаб қоʻйилди. Конституциянинг 4-моддасига биноан Оʻзбекистонда Д.т.— оʻзбек тилидир. Қорақалпогʻистонда бундай мақом қорақалпоқ тилига ҳам берилган. Мамлакатда юз бераётган реал жараёнлар ва имкониятларни ҳисобга олиб, лотин ёзувига асосланган оʻзбек алифбосини узил-кесил жорий этишни босқичма босқич амалга ошириб бориш вазифаси тил ислоҳоти билан богʻлиқ масалаларга зарур тузатишлар киритиш эҳтиёжини тугʻдирди, республика ҳали собиқ Иттифоқ таркибида боʻлган ва маданий-маʼнавий соҳада оʻзига хосликни мустаҳкамлашга интилган бир шароитда қабул қилинган Д.т. ҳақидаги қонуннинг коʻпгина моддаларига оʻзгартиришлар ва қоʻшимчалар киритишни тақозо этди. Натижада 1995-йил 22 дек.да Оʻзбекистон Республикасининг Д.т. ҳақидаги қонуни янги таҳрирда қабул қилинди. Оʻзбек тилининг Оʻзбекистон Республикаси ҳудудида Д.т. сифатида амал қилишининг ҳуқуқий асослари ушбу қонун ва б. қонунлар билан белгиланади. Оʻзбекистон Республикасида Д.т.ни оʻрганиш учун барча фуқароларга шарт-шароит яратилади ҳамда миллатлар ва элатларнинг тилларига иззат-ҳурмат билан муносабатда боʻлиш, уларнинг ривожланиши таʼминланади. Д.т.ни оʻқитиш бепул амалга оширилади (4-модда). Д.т.га ёки бошқа тилларга менсимай ёки хусумат билан қараш тақиқланади. Фуқароларнинг оʻзаро муомала, тарбия ва таʼлим олиш тилини эркин танлаш ҳуқуқини амалга оширишга тоʻсқинлик қилувчи шахслар қонун ҳужжатларига мувофиқ жавобгар боʻладилар (24-модда). Мамлакатда демократик, байналмилал тамойилларга риоя қилиниб, ҳар бир миллат ва элатнинг эркин ривожланиши, уларнинг тил мустақиллиги ва тенглиги таʼминланган. Таʼлимтарбия ишлари оʻзбек тилидан ташқари тожик, рус, қозоқ, корейс, туркман, қиргʻиз тилларида ҳам амалга оширилади. Миллий марказларнинг фаолияти учун етарли имконият яратилган. Шахсга миллати, ирқи, тили, урф-одат ва анʼаналарига қараб бирор имтиёз бериш ёки шу важдан ҳуқуқларини чеклаш жавобгарликка сабаб боʻлади.