Loyiha matni 49901-(61999)

195-modda. “Xavfni tahlil etish” tizimi
“Xavfni tahlil etish” tizimi tegishli nazorat sohasi boʻyicha aniq mezonlarga asoslanib,
tadbirkorlik subyektlari tomonidan oʻz faoliyatida qonunchilik hujjatlarining buzilish xavfi darajasining
aniqlash mexanizmini oʻz ichiga oladi.
“Xavfni tahlil etish” tizimi tadbirkorlik subyektlari bilan bevosita oʻzaro aloqa oʻrnatmasdan
qoʻllaniladi.
Nazorat qiluvchi organlarning “Xavfni tahlil etish” tizimining mezonlari va baholash tartibi
ochiq, shaffof va tadbirkorlik subyektlari uchun axborot tizimlarida ochiq shaklda joylashtirilishi lozim.
Nazorat qiluvchi organlar faoliyatida “Xavfni tahlil etish” tizimini joriy etish mezonlari va
tartibi, ularning nazoratni amalga oshirish xususiyatlaridan kelib chiqib, vakolatli organ va Oʻzbekiston
Respublikasi Savdo-sanoat palatasi bilan kelishilgan holda nazorat qiluvchi organlar tomonidan
belgilanadi.
Tadbirkorlik subyektlari tomonidan qonunchilik buzilishining sodir etish xavfi darajasini
belgilashda barcha nazorat qiluvchi organlar uchun majburiy boʻlgan “Xavfni tahlil etish” tizimining
minimal talablari vakolatli organ tomonidan belgilanadi.
196-modda. Tekshiruv savolnomasi
Nazorat qiluvchi organlar tomonidan tadbirkorlik subyektlari faoliyati majburiy talablar reyestri
asosida tuzilgan tekshiruv savolnomalari (talablarga javob berishi yoxud bermasligini koʻrsatuvchi
nazorat savollarining roʻyxati) boʻyicha tekshiriladi.
Tekshiruv savolnomalari tadbirkorlik subyektlari faoliyati turlarining oʻxshash guruhlari
(faoliyatiga bir xil shart va talablar qoʻyiladigan tadbirkorlik subyektlari) uchun tegishli sohani tartibga
soluvchi davlat organi tomonidan vakolatli organ bilan kelishgan holda tasdiqlanadi. Tasdiqlangan
tekshiruv savolnomalari tartibga soluvchi davlat organlarining rasmiy veb-saytlariga va “Yagona davlat
nazorati” axborot tizimiga joylashtiriladi.

---