Loyiha matni 49901-(61999)

90-modda. Dehqon xoʻjaligidagi mulkiy munosabatlar
Dehqon xoʻjaligiga tegishli mol-mulk, dehqon xoʻjaligi aʼzolarining birgalikdagi faoliyati
natijasida olingan mahsulotlar va ularni realizatsiya qilishdan tushgan daromad, agar ular oʻrtasidagi
kelishuvga binoan umumiy ulushli mulk tashkil etish nazarda tutilgan boʻlmasa, ularning umumiy
birgalikdagi mulkidir.
Dehqon xoʻjaligi aʼzolari dehqon xoʻjaligini yuritish jarayonida yuzaga keladigan majburiyatlari
boʻyicha oʻzlarining birgalikdagi faoliyati natijasida vujudga kelgan umumiy mol-mulk bilan javob
beradi.
Dehqon xoʻjaligi aʼzolarining umumiy mol-mulki yetarli boʻlmaganda ular majburiyatlar
boʻyicha oʻzlariga tegishli mol-mulk bilan qonunchilikka muvofiq javobgar boʻladi.

---

project.gov.uz
06.06.2022
40
91-modda. Dehqon xoʻjaligi mahsulotlarini realizatsiya qilish
Tadbirkorlik subyektlari yagona davlat reyestridan koʻchirma asosida oʻz qishloq xoʻjaligi
mahsulotlarini qoʻshimcha hujjatlarsiz (ruxsatnomalarsiz) Oʻzbekiston Respublikasi hududida erkin
tashish va realizatsiya qilish huquqiga ega.
Dehqon xoʻjaligi oʻzining qishloq xoʻjaligi mahsulotlarini dalasida, dehqon bozorlarida va savdo
markazlarida, shuningdek aholi punktlarida sayyor savdo tashkil etish yoʻli bilan qoʻshimcha
ruxsatnomalarsiz realizatsiya qilish huquqiga ega.
Dehqon xoʻjaligi oʻzining qishloq xoʻjaligi mahsulotlarini naqd pulga yoki bank kartalari
boʻyicha naqd pulsiz hisob-kitoblar orqali cheklovlarsiz realizatsiya qilish huquqiga ega. Bunda dehqon
xoʻjaligi xoʻjalik yurituvchi subyektlar uchun kassa operatsiyalari qoidalarida nazarda tutilgan hisob
yuritishi shart emas.
Dehqon xoʻjaligi tomonidan oʻzining qishloq xoʻjaligi mahsulotlarini realizatsiya qilishdan
olingan daromadlarga soliq solinmaydi.
Dehqon xoʻjaligi yil davomida yer uchastkasida yetishtirilgan qishloq xoʻjaligi ekinlarining
turlari, ishlab chiqarilgan va realizatsiya qilingan qishloq xoʻjaligi mahsulotlarining hajmlari, shuningdek
issiqxonalar soni toʻgʻrisidagi axborotni oʻz ichiga olgan belgilangan shakldagi maʼlumotnomani dehqon
xoʻjaligi joylashgan yerdagi fuqarolarning oʻzini oʻzi boshqarish organiga hisobot davridan kelgusi
yilning 15-martiga qadar taqdim etadi.