Личинка хордалилар (Urochordata) ¸ки šобиšлилар (Tunicata) кенжа типи

Oltin krotlar (Chrysochoridae) oilasi vakillari oddiy krotga o`xshash bo`lib, Janubiy Afrika cho`llarida tarqalgan, yer tagida yashaydi.
Tenreklar (Tenrecidae) oilasiga 31 ta tur kirib, ular Markaziy Afrikada Madagaskar va Kanar orollarida tarqalgan. Tenreklarning terisi siyrak qillar yoki ignalar bilan qoplangan. Shuning uchun tenreklarni qilli tipratikanlar ham deyiladi. Ularning tana uzunligi 4 sm dan 39 sm gacha, dumining uzunligi 22 sm gacha keladi. Oldingi oyoqlarida 4 ta yoki 5 ta, orqa oyoqlarida 5 ta barmoqlari bor. Siydik-tanosil va anal teshiklari kloakaga ochiladi.
Tenreklar hasharotxo`rlar turkumining eng primitivi hisoblanadi. Ayrim turlarining hayoti suv bilan bog’liq. Qurg’oqchilik fasllarida, noqulay sharoit tug’ilganda ayrim turlari uyquga ketadi. 16 tagacha bola tug’adi. Yirik tenreklarning go`shtini mahalliy aholi ovqatga ishlatadi.
Cho`l uzunoyoqlari (Macroscelidae) oilasi vakillari Afrikaning cho`l mintaqalarida tarqalgan. Ularning orqa oyoqlari uzun, oldingi oyoqlari kalta bo`ladi, tashqi ko`rinishidan qo`shoyoqlarga o`xshaydi.
Junqanotlilar (Dermoptera) turkumi. Bu turkum vakillari Janubiy Sharqiy Osiyoda hamda unga qo`shni orollardagi tropik o`rmonlarda yashaydi. Tashqi ko`rinishida hasharotxo`rlar, ko`rshapalaklar va chala maymunlarga o`xshash belgilari bor. Junqanotlilarning 2 ta turi bor, o`lchami mushukdek keladi. Gavdasining uzunligi 43 sm gacha, dumining uzunligi 27 sm gacha, massasi 1,7 kg gacha boradi. Uning to`rtala oyog’i bilan dumini o`rab olgan keng, serbar jun bilan qoplangan teri pardasi bor. Junqanotlilar, asosan daraxtlarda yashaydi, ular gavdasining atrofidagi parda yordamida xuddi uchib o`tganday parvoz qilib, bir daraxtdan ikkinchi daraxtga 60-110 m gacha masofani sakrab uchib o`tadi. Junqanotlilar o`simliklar bilan oziqlanadi. Bir yilda bir marta bola tug’adi. Ularning bolasi onasi bilan bir yilcha birga yashaydi. Tipik vakili malay junqanoti yoki kaguan (Cynocephalus variegatu) hisoblanadi. Mahalliy aholi kaguanlarni go`shti va mo`ynasi uchun ov qiladi.