|
ӘМИЎДИ АТЛАҒАН ЖОЛЛАРЫҢ СЕНИҢ
(21-декабрь 1974-жыл Нөкиске биринши поезд келгендеги митингде оқылған қосық)
Бахтыңның булағы бурқып сағадан,
Күн-күннен узайған қолларың сениң.
Нөкисиме қут дарытар жаңадан
Әмиўди атлаған жолларың сениң.
Уллы ырыс бар усы жолдың өзинде,
Туўры сарраслық бар басқан изиңде,
«Жүриң, апарайын коммунизмге».
Деп шақырып турар жолларың сениң.
Көп заманлар кешти жолы тар болып,
Көпири пүтин арба жолға зар болып,
Енди не тилесең бәри бар болып,
Дүньяға тутасты жолларың сениң.
Ел бийкарға ертек ядлаған емес.
Ата-баба босқа датлаған емес,
Дәрьяны ҳеш дүлдил атлаған емес,
Дәрьяны атлаған жолларың сениң.
Анам Өзбекстан – алтын дәўраным,
Ташкенттен жоллап тур қутлы кәрўанын,
Шағла қарақалпақ, питип әрманың,
Мудам ғурғынласар ҳалларың сениң.
«Бейнеў–Коңыратқа» шықсаң жағалап,
Азаў қазақ ағайинди аралап,
Арқадан, қубладан танабын орап,
Ибрайым Юсупов - Йош
kitapxana.com
- Қарақалпақ әдебиятының электрон китапханасы 25
Мәскеўден төтелер жолларың сениң.
Бул жол бизиң әрманымыз әсирлик,
Кәрўан келсе жүгимиз көп тасырлық,
Тақыятас тарнаўынан асырылып,
Жәйҳүнди атлаған жолларың сениң.
Бул жол халықтың күткен дәркарлық жолы,
Партияның уллы ғамхорлық жолы,
Абаданлық шадлы дәўранға толы,
Шын дослықтың жолы-жолларың сениң.
Бул жолды салғанның қолы гүл болсын,
Халқым, ырыс-несибең және мол болсын,
Бул темир жол емес, алтын жол болсын.
Қутлы болсын жаңа жолларың сениң!
Декабрь, 1974 ж.
БИЛИМ БУЛАҒЫ
(Нөкис Мәмлекетлик университетиниң ашылыў салтанатында оқылған қосық.
31-август, 1976-жыл)
Бүгин, дослар, қарақалпақ елинде
Журт айта жүргендей байрам болажақ.
Бир әжайып булақ шығып жеримде,
Суўын ишпегенге әрман болажақ.
Әмиўдиң суўлары жан берсе жерге,
Бул булақ руҳый қан берер елге.
Халқым, қутлы болсын бул алтын ирге,
Билим менен сүрер дәўран болажақ.
Ибрайым Юсупов - Йош
kitapxana.com
- Қарақалпақ әдебиятының электрон китапханасы 26
Ленин талиматы шамшырақ жағып,
Космослық билимниң булағы ағып,
Адам ай өңирине значок тағып,
Алыс жулдызларға мийман болажақ.
Мың алғыс данышпан партиямызға,
Мәртебемиз мегзер бәлент жулдызға.
Бул булақтан ишкен мың сан ул-қызға
Ығбал-несибелер молдан болажақ.
Уллы рус ағам қушағын ашып,
Анам Өзбекстан баўырына басып,
Ленинлик дослықтың күни нур шашып,
Дәўранлар үстине дәўран болажақ.
Жүреклер шәўкилдеп шадлыққа толып,
Заман алға кетти, ел абад болып.
Бируний бабамның руўҳы шад болып,
Илим дарақлары нәрўан болажақ.
Машақатлы билим соқпағын басып,
Келер жаңа әўлад дәрьядай тасып,
Бул булақтан ишкен дийқан баласы
Халқымның дәртине дәрман болажақ.
Нур орнап пахтамның ханаларында,
Ақ салы майысқан далаларымда,
Жаңарған Жәйҳунның жағаларында
Бул булақтан бәлент қырман болажақ.
Билимли ел тулпар шығып мыңлардан,
Алтын жуўып алар Қызыл қумлардан.
Еллик, Жамбас қала яңлы тыңларда
Жуўсанлы далалар гүлшан болажақ.
Ибрайым Юсупов - Йош
kitapxana.com
- Қарақалпақ әдебиятының электрон китапханасы 27
Пахта шанағында ақ алтын уйып,
Бағлар мол жемистен шақасын ийип,
Сибирьдиң суўлары Аралға қуйып,
Үстүрт саҳралары бостан болажақ.
Бул булақтан ишкен жаслар қунт пенен,
Менделеев соққан сырлы гилт пенен
Шөллер ғәзийнесин ашып күтпеген,
Уллы Ўатанына инам қылажақ.
Ҳәр аўылдан даңқлы илимпаз шығып,
Жаңа Бердақ пенен Әжинияз шығып,
Жаңа Қаныш, жаңа Қарынияз шығып,
Ҳәр үйде бир ҳәким Луқман болажақ.
Сәлем, жана әўлад Одиссейлери,
Даламның болажақ Галилейлери!
Илим дүньясының пидәкерлери
Тәбият сырына ҳәмдам болажақ.
Сырлы ҳикметлердиң уллы мектеби,
Сәлем, Королевлар келешектеги!
Қарақалпақтың жаңа Улығбеклери
Жулдыз сәўбетине әнжам болажақ.
Бул булақтан ишиў несип еткенлер,
Билим шыңларына қолы жеткенлер.
Биздей ертеректе оқып кеткенлер,
Бүгин көзи қызып, ҳайран болажақ...
Өрлеп жаңа дәўран шыңына қарай,
Заманымыз қосар шырайға шырай.
Биз тасын қалаған бул мәрмер сарай
Ибрайым Юсупов - Йош
kitapxana.com
- Қарақалпақ әдебиятының электрон китапханасы 28
Жаңа жулдызларға аспан болажақ.
Қара қалпағымды алып қолыма,
Бас ийемен уллы Ленин жолына.
Коммунизм орнап Әмиў бойына,
Заман бир әжайып заман болажақ.
Август, 1976-ж.
Do'stlaringiz bilan baham: | 
