Kirish,,0'rta asrlar tarixi haqida

Qo`zg`olonning oqibatlari. Qo`zg`olon yengildi, lekin izsiz ketmadi. Dahshatli qo`zg`olon feodallarni qo`rqitib qo`ydi. Ular bun-dan keyin dehqonlarning majburiyatlarini yanada ko`paytirishga botina olmadilar. Dehqonlarni to`lov evaziga shaxsiy qaramlikdan ozod etishni tezlatdilar.

Dehqonlar qo`zg`olondan keyin o`z xo`jaliklarini nisbatan muvaf-faqiyatliroq rivojlantirish imkoniga ega bo`ldilar.

Angliya bilan sulh shartnomasining imzolanishi. Fransiya va Angliya o`rtasida 1360- yilda sulh shartnomasi imzolandi. Uning shartlari Fransiya uchun juda og`ir edi. Chunonchi, Fransiya hududining 1/3 qismi Angliya qo`liga o`tdi. Fransiya bunday og`ir shartni qabul qilishga majbur edi. Chunki Fransiyaning urushni davom ettirishga qurbi yetmas edi. Ertami-kechmi yana urush harakatlari boshlanishi muqarrar edi. Fransiya vaqtdan foydalanishga harakat qildi.

Chunonchi, qirol Karl V o`ziga bo`ysunishni xohlamagan sepa-ratchi hukmdorlarni tor-mor etdi. Moliya sohasida islohot o`tkazdi. Natijada qirol xazinasi qator doimiy daromad manbalariga ega bo`ldi. Bu qirolga yaxshi harbiy ta'lim ko`rgan qo`shin tuzish imkonini berdi. 120 kemadan iborat harbiy flot tashkil etdi. Tarixda birinchi bor og`ir artilleriya - to`p ixtiro etildi. Bu o`zgarishlar tez orada o`z samarasini berdi. 1369- yilda qayta boshlangan urushda Angliya qattiq mag`lubiyatga uchradi. Angliya qo`lida bir necha sohilbo`yi shaharlari qoldi, xolos. Biroq Karl V vafotidan so`ng vaziyat yana og`irlashdi. Fransiyada siyosiy inqiroz - saroy nizolari davri boshlandi. Bu mamlakatda hokimiyat uchun kurash avj olganligini anglatar edi. Siyosiy inqiroz Fransiyani halokat yoqasiga keltirib qo`ydi.