Касалликлари ва зараркунандаларига қарши

Касалликка қарши кураш чоралари қуйидагилар: Бордосс суюқлигини пуркаш ёки шунга ўхшаш препаратлардан фойдаланиш: Хом, Цинеб, Вектра, Строби, Топсин-М ва бошқалар.

Мевали дарахтлар раки

Бу касалликка чалинган мевали дарахтларнинг новдалари ва шохлари меъёрдан ташқари йўғонлашади, қобиғи ва ёғочи чирийди, танасида ғуррасимон яралар пайдо бўлади. Касаллик очиқ кўринишда шохлар бурчакларида ва куртак асосида учрайди. Ёпиқ кўринишдаги катта бўлмаган яра атрофида ғуррасимон йирик шилимшиқ ғубор вужудга келади.
Касалликка қарши кураш чоралари қуйидагилар: Дарахтнинг касаллик билан зарарланган новдаларини қирқиб ташлаш, зарарланган жойларини тозалаш ва у ерларга 1% ли Бордосс суюқлигини (100 литр сувга 1 килограмм мис купороси ва охак қўшиб) пуркаш.

Олхури занг касаллиги

Бу касаллик ўрик, шафтоли ва бодомни ҳам зарарлайди. Бу касалликда барг тарамлари орасида жигарранг доғлар пайдо бўлади ва улар катталашиб, барглар қурийди ва тўкилади. Замбуруғ тўкилган баргларда қишлайди.
Касалликка қарши кураш чоралари қуйидагилар: Касаллик аломатлари пайдо бўлганда унга 1% ли Бордосс суюқлиги (100 литр сувга 1 килограмм мис купороси ва охак қўшиб) билан ёки Хом, Цинеб, Вектра, Строби, Топсин- М лар билан ишлов бериш керак бўлади.

Тешикчали доғланиш касаллиги

Бу касаллик ўрик, шафтоли, бодом ва бошқа данакли мевали дарахтларни зарарлайди. Касалликка чалинган дарахт баргларида айланасимон қизғиш- қўнғир хошияли, диаметри 2-5 мм ли оч жигарранг доғлар пайдо бўлади. 7-15 кундан сўнг, доғлар бир хил рангга кириб, ўринларида тешиклар қолади. Кучли зарарланганда эса барглар тўкилиб кетади. Мевалардаги майда тўқ қизил чуқурча кўринишидаги доғлар 2-3 мм гача каттаяди ва сўгал кўринишини олади. Касалликка қарши кураш чоралари қуйидагилар: Касаллик аломатлари кўринган шохларни олиб ташлаш, куртак ёзилаётганда 1% ли Мис купороси билан ишлов бериш, вегетация даврида эса 1% ли Бордосс суюқлиги ёки унинг ўрнини босувчи препаратлар билан ишлов бериш, кузда барг тўкилишининг охирги даврида 3% ли Бордосс суюқлиги
(100 литр сувга 3 килограмм мис купороси ва охак қўшиб) ёки унинг алмаштирувчилари билан ишлов бериш.