Касалликлари ва зараркунандаларига қарши

С а р и м с о к п и ё з

Оқ чириш касаллиги

Бу касаллик билан оғриган саримсоқнинг барглари тепа тарафдан бошлаб сарғаяди ва ўсимлик нобуд бўлади. Ўсимликнинг томирларида ва тўқималарида замбуруғнинг оқ ғубори пайдо бўлади ва саримсоқ чирийди.
Касалликка қарши кураш чоралари: Ўсимликларни алмашлаб экишга риоя қилиш, соғлом уруғликларни ишлатиш, зарарланган ўсимликларни йиғиб олиш ва ёқиб ташлаш, саримсоқпиёзни тўла етилгандагина йиғиштириб олиш.

Мозаика касаллиги

Бу касалликка саримсоқнинг турли-туман навлари чалиниши мумкин. Ушбу касаллик билан оғриган саримсоқ ўсимлигининг барглари сарғаяди, пояси ётиб қолади ва пиёзлари эса буришиб, юмалоқ шаклини йўқотади. Баъзан уларда оқиш-сарғиш параллел йўллар пайдо бўлади.
Касалликка қарши кураш чоралари: алмашлаб экиш, зарарланган ўсимликларни йиғиштириб олиш ва ёқиб ташлаш, соғлом уруғларни экиш.

Сохта унли шудринг

Бу касалликка йўлиққан саримсоқ ўсимлигининг ёш баргларида овал кўринишидаги оч яшил рангли доғлар пайдо бўлади ва уларнинг юзасида замбуруғнинг кулранг сафсар ғуборлари хосил бўлади. Вақт ўтиши билан доғлар катталашиб, барглар сарғаяди ва қурийди. Натижада саримсоқлар яхши ривожланмайди. Касалликнинг ривожланишига ортиқча хаво намлиги ҳам таъсир қилади.
Касалликка қарши кураш чоралари: Ўсимликларни 1% ли Бордосс суюқлиги билан ёки 0.4% ли Хом препарати билан пуркаш яхши натижа беради.

Фузариоз

Бу касаллик билан оғриган ўсимликнинг барглари юқоридан бошлаб қуриб, тезлик билан нобуд бўлади. Томирларининг кўпи чирийди ва саримсоқлар юмшоқ бўлиб қолиб, тўқималари сувли бўлади. Касалликка юқори харорат ва хаво намлиги сабаб бўлади.

• 
  Касалликка қарши кураш чоралари: Ўсимликларни алмашлаб экиш, соғлом уруғликларни ишлатиш, зарарланган ўсимликларни йиғиб олиш ва ёқиб ташлаш, саримсоқни тўла етилгандагтна йиғиб олиш.
  
•