Jismoniy shaxslar daromadlaridan olinadigan soliq

Jismoniy shaxslarning daromadiga solinadigan soliqni to‘lashdan quyidagilar to‘laligicha ozod qilinadilar:

a) xorijiy davlatlar diplomatiya vakolatxonalarining boshliqlari va a'zolari hamda konsullik muassasalarining mansabdor shaxslari, ularning o‘zlari bilan birga yashaydigan oila a'zolari, agar ular O‘zbekiston Respublikasi fuqarosi bo‘lmasa, O‘zbekiston Respublikasidagi manbalardan olinadigan, diplomatlik va konsullik xizmati bilan bog‘liq bo‘lmagan daromadlaridan tashqari barcha daromadlari bo‘yicha;

b) xorijiy davlatlar diplomatiya vakolatxonalari va konsullik muassasalarining ma'muriy-texnik xodimlari va ularning o‘zlari bilan birga yashaydigan oila azolari, agar ular O‘zbekiston Respublikasi fuqarosi bo‘lmasa yoki O‘zbekiston Respublikasida doimiy yashamasa, O‘zbekiston Respublikasidagi manbalardan oladigan, diplomatlik va konsullik xizmati bilan bog‘liq bo‘lmagan daromadlaridan tashqari barcha daromadlari bo‘yicha;

v) xorijiy davlatlar diplomatiya vakolatxonalariga, konsullik muassasalariga xizmat ko‘rsatadigan xodimlar tarkibiga kirgan shaxslar, agar ular O‘zbekiston Respublikasi fuqarosi bo‘lmasa yoki O‘zbekiston Respublikasida doimiy yashamasa, o‘z xizmati yuzasidan oladigan barcha daromadlari bo‘yicha;

g) xorijiy davlatlar diplomatiya vakolatxonalari va konsullik muassasalari xodimlarining uylarida ishlovchilar, agar ular O‘zbekiston Respublikasi fuqarosi bo‘lmasa yoki O‘zbekiston Respublikasida doimiy yashamasa, o‘z xizmati yuzasidan oladigan barcha daromadlari bo‘yicha;

d) xukumatga qarashli bo‘lmagan xalqaro tashkilotlarning mansabdor shaxslari — agar ular O‘zbekiston Respublikasi fuqarosi bo‘lmasa, ushbu tashkilotlarda olgan daromadlari bo‘yicha;

ye) Mudofaa, Ichki ishlar, Favqulodda vaziyatlar vazirliklarining, Milliy xavfsizlik xizmatining harbiy xizmatchilari, ichki ishlar organlari va bojxona organlarining oddiy xizmatchilari va boshliqlari tarkibiga mansub shaxslar, shuningdek o‘quv yoki sinov yig‘inlariga chaqirilgan harbiy xizmatga majburlar — xizmatni o‘tash (xizmat vazifasini bajarish) munosabati bilan olgan pul ta'minoti, pul mukofotlari va boshqa to‘lov summalari bo‘yicha;

j) gastrol'-konsert faoliyati bilan shug‘ullanish huquqini beruvchi litsenziyasi bo‘lgan shaxslar — gastrol-konsert faoliyatidan olingan daromadlari bo‘yicha;

z) mansab darajalari mavjud bo‘lgan prokuratura organlari xodimlari.

Quyidagi soliq to‘lovchilarning daromadlari jismoniy shaxslar daromadiga solinadigan soliqni har bir to‘liq oy uchun eng kam ish haqining to‘rt baravari miqdorida to‘lashdan ozod etiladi:

1) «O‘zbekiston Qaxramoni», Sovet Ittifoqi Qaxramoni, Mehnat Qaxramoni unvonlariga sazovor bo‘lgan shaxslar, uchala darajadagi Shuxrat ordeni bilan taqdirlangan shaxslar, urush nogironlari yoxud 1941-1945 yillardagi urush davrida harbiy xizmatning boshqa majburiyatlarini bajarish chog‘ida yaralanish, kontuziya bo‘lish yoki shikastlanish oqibatida yoxud frontda bo‘lish bilan bog‘liq kasallik tufayli nogiron bo‘lib qolgan harbiy xizmatchilar jumlasidan bo‘lgan boshqa nogironlar, sobiq partizanlar jumlasidan bo‘lgan nogironlar, shuningdek pensiya ta'minoti bo‘yicha mazkur toifadagi harbiy xizmatchilarga tenglashtirilgan boshqa nogironlar.

Yuqorida aytib o‘tilgan imtiyozlar uchun «O‘zbekiston Qahramoni», Sovet Ittifoki Qahramoni, Mehnat Qahramoni unvonlari kitobchalari, uchala darajadagi Shuxrat ordeni bilan taqdirlanganlarning orden kitobchasi, Ulug‘ Vatan urushi nogironlarining «Ulug‘ Vatan urushi nogironi guvohnomasi» yoki harbiy komissariatdan berilgan ma'lumotnomasi, boshqa nogironlarning «Imtiyozga bo‘lgan huquq to‘g‘risidagi nogiron guvohnomasi» asos hisoblanadi;

2) xizmatni harakatdagi armiya tarkibiga kirgan harbiy qismlar, shtablar va muassasalarda o‘tagan harbiy xizmatchilar, sobiq partizanlar jumlasidan bo‘lib, fuqarolar urushi va 1941-1945 yillardagi urush, sobiq SSSRni himoya qilish bo‘yicha boshqa jangovar operatsiyalarning qatnashchilari, 1941-1945 yillardagi urush davri mehnat frontining faxriylari va konsentratsion lagerlarning sobiq yosh tutqunlari.

Imtiyoz «Urush qatnashchisi guvohnomasi» asosida, Ulug‘ Vatan urushi davri mehnat frontining faxriylari va konsentratsion lagerlarning sobiq yosh tutqunlari uchun «Imtiyozlarga bo‘lgan huquq to‘g‘risida guvohnoma» yoki mehnat va ijtimoiy ta'minot organlarining ma'lumotnomasi asosida taqdim etiladi;

3) Leningrad qamali paytida 1941 yil 8 sentyabrdan 1944 yil 27 yanvargacha bo‘lgan davrda Leningrad shahrida ishlagan fuqarolar.

Imtiyoz qamal paytida Leningrad shahridagi korxona, muassasa va tashkilotlarda mazkur shaxslarning ishlaganligini tasdiqlovchi hujjatlar asosida taqdim etiladi;

4) ichki ishlar organlarining boshliqlari va oddiy xizmatchilari jumlasidan bo‘lib, xizmat vazifalarini bajarish chog‘ida yaralanish, kontuziya bo‘lish va shikastlanish oqibatida nogiron bo‘lib qolganlar.

«Imtiyozga bo‘lgan huquqi to‘g‘risida nogiron guvohnomasi» imtiyoz taqdim etish uchun asos hisoblanadi;

5) bolalikdan nogiron bo‘lib qolganlar, shuningdek 1 va II guruh nogironlari.

Pensiya guvohnomasi yoki shifokorlik - mehnat ekspertiza komissiyasining ma'lumotnomasi asosida imtiyoz taqdim etiladi;

6) qaxramon onalar, o‘n va undan ortiq bolasi bo‘lgan ayollar.

«Qaxramon ona daftarchasi» yoxud bolalarning mavjudligini tasdiqlovchi fuqarolar o‘zini-o‘zi boshqarish organining ma'lumotnomasi imtiyoz taqdim etishda asos bo‘ladi;

7) sobiq SSSRni himoya qilish yoxud harbiy xizmatning boshqa majburiyatlarini bajarish chog‘ida yaralanish, kontuziya bo‘lish yoxud shikastlanish oqibatida yoki frontda bo‘lish bilan bog‘liq kasallik tufayli xalok bo‘lgan harbiy xizmatchilarining ota-onalari va rafiqalari.

«Xalok bo‘lgan jangchining bevasi (onasi, otasi)» shtampi bosilgan yoki pensiya guvohnomasini bergan muassasa muxri va raxbarining imzosi bilan tasdiqlangan tegishli yozuv qayd etilgan pensiya guvohnomasi asosida imtiyoz taqdim etiladi.

Agar ushbu shaxslar pensioner bo‘lmasalar, ularga sobiq SSSRning Mudofaa vazirligi, DXK yoki IIV, shuningdek O‘zbekiston Respublikasi Mudofaa vazirligi, MXX yoki IIVning tegishli organlari tomonidan be-rilgan harbiy xizmatchining xalok bo‘lgani to‘g‘risidagi ma'lumotnoma asosida imtiyoz beriladi.

Sobiq SSSRni himoya qilish yoki harbiy xizmatning boshqa majburiyatlarini bajarish chog‘ida yoxud frontda bo‘lish bilan bog‘liq kasallik tufayli halok bo‘lgan harbiy xizmatchilarniig rafiqalariga faqat ular ikkinchi marta turmush qurmagan taqdirda, imtiyoz taqdim etiladi;

8) xizmatni Afg‘oniston Respublikasida va jangovar xarakatlar olib borilgan boshqa mamlakatlarda vaqtincha bo‘lgan qo‘shinlarning cheklangan kontingenti tarkibida o‘tagan harbiy xizmatchilar hamda o‘quv va sinov yig‘inlariga chaqirilgan harbiy xizmatga majburlar.

«Imtiyoz huquqiga egaligi to‘g‘risida guvohnoma» yoki sobiq SSSRning Mudofaa vazirligi, DXK yoki IIVga qarashli korxonlar, muassasalar yoki tashkilotlar, shahar (tuman) harbiy komissariati, harbiy qism, harbiy-o‘quv bilim yurti, shuningdek O‘zbekiston Respublikasi Mudofaa vazirligi, MXX yoki IIV tomonidan berilgan ma'lumotnoma imtiyoz taqdim etilishi uchun asos hisoblanadi;

9) Chernobil AESdagi falokat oqibatida jabr ko‘rgan shaxslar.

Tibbiy-mehnat ekspertiza komissiyasi ma'lumotnomasi, nogironning maxsus guvohnomasi, Chernobil AESdagi avariya oqibatlarini tugatish ishtirokchisining guvohnomasi, shuningdek imtiyoz taqdim etilishida asos hisoblanadigan boshqa vakolatli organlar tomonidan berilgan hujjatlar asosida imtiyoz beriladi;

10) ikki va undan ortik o‘n olti yoshga to‘lmagan bolalari bor yolg‘iz onalar.

Mehnat va ijtimoiy ta'minot organlari tomonidan beriladigan «Yolg‘iz onaning shaxsiy daftarchasi asosida imtiyoz beriladi;

11) ikki va undan ortiq bolasi bor va boquvchisini yo‘qotganlik uchun pensiya olmaydigan beva ayol va beva erkaklar.

Turmush o‘rtog‘i (ayoli) vafot etganligi to‘g‘risidagi guvohnoma va bolalarining mavjudligini hamda qayta nikohdan o‘tmaganligini tasdiqlovchi pasport, boquvchisini yo‘qotganligi tufayli pensiyasining tayinlanmaganligi to‘g‘risida mehnat va ijtimoiy ta'minot organlarining ma'lumotnomasi imtiyoz berilishida asos hisoblanadi;

12) bolaligidan nogiron bo‘lgan va doimiy parvarishni talab qiladigan farzandi bilan birga yashab, uni tarbiyalayotgan ota-onasidan biri.

Pensiya guvohnomasi yoki doimiy parvarish talab etilishini tasdiqlovchi sog‘liqni saqlash muassasasining tibbiy ma'lumotnomasi, birga yashashligi haqida — fuqarolar o‘zini-o‘zi boshqarish organining ma'lumotnomasi asosida imtiyoz taqdim etiladi;

13) korxonalar, muassasalar, tashkilotlar va o‘quv yurtlari tomonidan qishloq xo‘jalik ishlariga yuborilgan fuqarolar — ushbu ishlarni bajarganlik uchun olgan daromadlari bo‘yicha.

Qishloq xo‘jalik korxonasining tegishli qarori yoki raxbar buyrug‘i imtiyozni qo‘llash uchun asos bo‘ladi. Jismoniy shaxslarning imtiyozlarga bo‘lgan huquqi ular hisobot yili uchun tegishli hujjatlarni taqdim etganida vujudga keladi. Hisobot yili uchun eng kam ish haqining to‘rt baravari miqdoridagi imtiyozga ega bo‘lgan huquq yuzaga kelgan oy boshidan taqdim etiladi. Eng kam ish haqining to‘rt baravari miqdoridagi imtiyoz («n» kichik bandida ko‘rsatilganlardan tashqari) jismoniy shaxslarning asosiy ish joyida, agar asosiy ish joyi mavjud bo‘lmasa, unda yashash joyidagi davlat soliq xizmati organlari tomonidan jami yillik daromad to‘g‘risidagi deklaratsiya asosida soliq hisoblab chiqarilishi qo‘llaniladi.