Ájiniyaz atindaǵi Nókis mámleketlik

Aǵashtan xojalıq buyımların soǵıw.
Xojalıq buyımların soǵıwda onıń orınlaytuǵıın wazıypasına qarap qanday aǵash túrinen soǵılıwı anıqlap alınadı. Tiykarınan paydalanılatuǵın aǵash materialınıń qattılıǵı jáne onnan paydalanıw barısında júz beretuǵın tásirlerge shıdamlılıq dárejesi esapqa alınadı. Mısalı, palız ónimlerin tuwraytuǵın arnawlı taxtayshanı ádette ortasha qattılıqtaǵı aǵashlardan hár túrli formalarda soǵıladı.
Taxtayshanıń ayaqları ápiwayı yamasa burama shegeler menen bekkemlenedi. Bul buyımdı soǵıw ushın aǵashtı tańlaw, onda rejelew sızılmasın sızıw, pıshqılaw, súrgilew, tesiw, ısqılap tegislew hám ayaqshaların biriktiriw jumısları islenedi. Bul taxtaydıń átirapların túrli naǵıslar menen bezetiwge de boladı.
Bunday taxtayshalardı asxana diywalındaǵı qazıqqa ildirip saqlaw júdá qolaylı. Bunday asıp qoyıwǵa arnalǵan taxtayshalardıń artqı tárepi sulıw naǵıslar menen bezetiledi. Kóbinese usınday bezetiletuǵın taxtayshalarǵa ayaqshalar islenbeydi, olardıń bezetilgen tárepi kórinip turatuǵın etip qazıqqa ildirilip qoyıladı.


Kishi kórinistegi stol-stul mebel toplamın soǵıw.
Adamnıń ruwxıy jaǵdayı ózi islep atırǵan jumısında, óz sáwlesin tawmay qalmaydı. Adamnıń ruwxıy jaǵdayın kóteriwde bolsa bólmeniń úskeneleniwi, qolaylılıǵı, taza hám azadalıǵı da áhmiyetke iye. Bólmeni bezep turatuǵın buyımlardan biri mebeller esaplanadı. Mebeller, tiykarınan aǵash materiallardan soǵıladı.
Aǵashtan hár túrli kórinislerdegi buyımlardı soǵıwǵa boladı. Aǵashtıń isleniwi ańsat hám tábiyǵıy shiyki zat bolǵanı ushın onnan turmısta kóplep paydalanıladı. Búgingi kúnde aǵashtan mebeller soǵıwda zamanagóy shiyki zat materiallarınan paydalanıladı. Mebellerdiń túrleri hár túrli bolıp, olarǵa uyqı hám dem alıw ushın arnalǵan mebeller, kiyim-kensheklerdi saqlaw ushın, ayaq kiyimler jáne televizor, radio hám basqa texnikalıq qurallardı saqlaw ushın mólsherlengen mebellerdi mısal etiw múmkin. Mebeller shańaraqlarda ıqsham hám sulıw etip jaylastırılıwı kerek. Texnikalıq qurallar ushın mólsherlengen mebellerdiń sırtqı kórinisi ashıq reńlerde hám ashıq jerleri kóbirek bolıwı kerek. Ashıq qaldırılǵan jerler qoyılatuǵın texnikalıq quraldıń ólshemine qarap sáykeslenedi. Kiyim-kenshekler ushın mólsherlengen mebellerde kiyim-kensheklerdi tártipli jaylastırıw ushın arnawlı shkaflar boladı. Shkaflardıń jabıq bolıwı maqsetke muwapıq. Mebellerdi soǵıwda soǵılatuǵın aǵashtıń túrin de durıs tańlaw kerek. Tábiyǵıy qattılıǵı joqarı bolǵan aǵashlardan sapalı mebel soǵıladı. Stuldı soǵıwda qattı aǵashlardan paydalanıladı. Sebebi stul awır salmaqtaǵı adamlardı kóterip turıwı kerek. Bekkemligi joqarı bolǵan aǵashlar buǵan shıdam bere aladı. Stolǵa awırlıq stulǵa qaraǵanda azlaw túsedi. Sonıń ushın stol soǵıwda ortasha qattılıqtaǵı aǵashlardan paydalanıladı.