Жараёни таъсири

Ип структурасига чирмашиш коэффициентининг таъсири

Пневмомеханик ип хоссалари хусусиятларидан устувори унинг мураккаб структуралигидадир. Йигириш камераси новидаги узун учдан ипнинг ўзак қисми ва калта учдан эса ипнинг устки қатлами шаклланиши шу структуранинг асосидир. Структурадаги қатламларнинг улушлари ўзгариб туриши юқоридаги параграфда кўрилган. Унга биноан йигириш камерасининг диаметри катталашган сари чирмашиш коэффициенти камаяди, нуқсонли «иккинчи сифатли» ип шаклланмайди, ипнинг сифат кўрсаткичлари яхшиланади. Бу ҳолатни амалда синаш мақсадида тажрибалар ўтказилди, яъни ВD-330 пневмомеханик йигириш машинасида йигириш камераси диаметрининг ип структураси ва хоссаларига таъсири ўрганилди. Тошкент тўқимачилик ва енгил саноат институти (ТТЕСИ) «Табиий ва кимёвий толаларни йигириш» (ТКТЙ) кафедрасининг ўқув-илмий лабораториясида йигириш камераси диаметрлари 34, 54 ва 66 мм ларида чизиқий зичлиги бир хил – 30 тексли ип йигирилди. Йигириш камераси диаметрининг чирмашиш коэффициентига таъсири (10) формула асосида ҳисобланди.

Ип таркибидаги ташқи ва ички қатлам кўндаланг кесимларидаги толалар миқдори, чизиқий зичлиги ва пишитилганлик кўрсаткичлари (11; 12; 20) формулалар ёрдамида ҳисобланиб, уларнинг чирмашиш коэффициентига боғлиқлиги таҳлил этилди. ¥исобларда 5-I толасининг тажрибавий варианти штапель узунлиги 32,5 мм лиги инобатга олинди ва чирмашиш коэффициенти ҳисобланди (4-расм).

Кўриниб турибдики, чирмашиш коэффициенти қиймати йигириш камераси диаметрининг 34 мм дан 66 мм гача катталашганда деярли икки марта (0,16 дан 0,08) гача камайган. Бу ўзгариш ипнинг ўзак ва ташқи қисмлари кўрсаткичларига ҳам таъсир этиши муқаррар. Шуни эътиборга олиб, чирмашиш коэффициентининг ипнинг ўзак ва ташқи қатлами чизиқий зичлигига ва унинг пишитилганлигига таъсири тегишли формулалар ёрдамида ҳисобланиб графиклари 5-расмда келтирилди.

Графиклар таҳлил қилинганда ипнинг ўзак қисми чизиқий зичлиги чирмашиш коэффициенти икки марта ошганида 27,7 тексдан 25,4 тексгача (8,3%) камайиши, ташқи қатлам чизиқий зичлиги эса тегишлича 2,3 тексдан 4,6 тексгача, яъни икки марта чирмашиш коэффициентига мутаносибликда ортиши аниқланди.
Чирмашиш коэффициентининг ип ички ва ташқи қатламларига таъсири (5-расм в, г) да кўрсатилган. ичқи қатламдаги бурамлар сони тадқиқот диапозонида энг катта 806 б/м бўлса, энг кичиги 774 б/м, яъни 32 б/м (4,0%) га камдир. Бунинг сабаби чирмашиш коэффициенти таъсири билан изоҳланади. Ташқи қатлам бурамларининг энг катта сони 327 б/м бўлса, энг кичиги 235 б/м га тенг бўлиб фарқ 28% ни ташкил этади.
Шуни таъкидлаш лозимки, чирмашиш коэффициентининг катталигига йигириш камераси айланишлари частотаси таъсир кўрсатмаганлиги боис ип структураси ўзгармайди. Чирмашиш коэффициентининг бурамлар сонига таъсир этиб, уни ўзгартириши натижасида ип хоссаларидан узиш кучи ва деформацияси ўзгаришига олиб келади. Буни иплар қайишқоқлиги назарияси асосида ипнинг механик хоссаларини баҳолашда кўриш мумкин. Бошқача қилиб айтганда, ип пишитилганда толанинг ип ўқига нисбатан оғиш бурчаги (пишитиш бурчаги) ўзгариши билан ипнинг чўзишдаги деформацияси ва бошқа механик хоссалари ҳам ўзгаради. Шунинг учун ип ташқи қатлами бурамларининг сони 20% га камайиши, ўзак қисми бурамлар сонининг тегишлича ортиши, албатта, ипнинг механик хоссаларига таъсир кўрсатади. Шундай қилиб, ипнинг структураси чирмашиш коэффициентига боғлиқ бўлиб, у камайган (йигириш камераси диаметри катталашган) сари ички қатламдаги толалар сони (чизиқий зичлиги) ортади, бурамлар сони йўқолиши камаяди. Натижада ипнинг сифати (узиш кучи) яхшиланади деган хулосага келиш мумкин.