Izohli lug‘at boshqaruv

IZOHLI LUG‘AT
Boshqaruv – bu so‘z odatda aniq bir maqsadga erishish uchun boshqariluvchi tizim (yoki boshqaruv obyekti)ga faol ta’sir ko‘rsatish to‘g‘risida gapirilganda qo‘llaniladi. Bu o‘ziga xos yuksak san’at va mahoratni talab qiluvchi faoliyat bo‘lib, qaror qabul qilish va uning bajarilishini nazorat qilishdir.
Boshqaruv algoritmi – bu ta’lim tashkiloti rahbarlari boshqaruv faoliyatining ketma-ketligi (izchilligi).
Boshqaruv vakolatlari – ta’lim tashkilotini boshqarishda ta’lim tashkiloti rahbari yoki boshqa rahbarlar tomonidan o‘z qo‘l ostidagi xodimlarga o‘zi javobgar bo‘lgan vazifalari.
Boshqaruv vositalari – innovatsiyalar boshqaruv madaniyatining eng muhim va asosiy vositalaridan biri sifatida namoyon bo‘ladi va ular innovatsion jarayonlarda nafaqat o‘zining tavsifi va xususiyatlari bilan, balki boshqaruv madaniyatining eng muhim xususiyatlari sifatida ham belgilanadi.
Boshqaruv jarayoni negizi – har qanday ta’lim tashkilotining asosiy vazifasi hisoblangan pedagogik jarayonlarni ilmiy asosda tashkil etish va uni takomillashtirish.
Boshqarishning demokratik tamoyili – uning mohiyati, asosan, boshqarish jarayoniga barcha jamoa a’zolarini jalb etish, qarorlar qabul qilishda, tashkilot maqsadi va vazifalarini belgilashda barcha xodimlar qatnashishini taqozo etadi.
Boshqaruv madaniyati – umumiy ijtimoiy madaniyatning tashkil etuvchi komponenti sifatida mahlum bir ijtimoiy madaniyat kontekstida boshqaruv tushunchalari, munosabatlarning o‘zaro tahsir etishi.
Boshqaruv mas’uliyati – ta’lim tashkiloti oldiga qo‘yilgan maqsadlarga erishish, pedagogik jarayonlarni zamonaviy talablarga mos, ilmiy asosda tashkil etish, sub’ektlar faoliyatini muvofiqlashtirish.
Boshqaruv muloqoti – pedagogik jarayonlarni tashkil etish va boshqarish, sub’ektlar faoliyatini muvofiqlashtirish jarayonidagi muloqot, ya’ni sub’ektlarning faolliklarini ta’minlash, xatti-harakatlarini maqsadga yo‘naltirish yoki motivlashtirishdir.