Исломий молия тарихи исломий ва анъанавий молиялаштириш ўртасидаги тафовут

сукук ал-мушоракада – SPV ва қарздор шерикчилик иштирокчилари бўладилар. Сукук ал-музорабадан фарқли ҳолда, инвесторлар шерикчилик ишларини бошқаришда қатнашиш имкониятига эгадирлар;
сукук ал-ижарада – SPV ва қарздор мулкни олди-сотди шартномаси (қарздор активни SPV га сотади) ва мазкур мулк ижара шартномаси (қарздор SPV дан ижара муддати якунида сотиб олиш ҳуқуқи билан активни ижарага олади)ни тузадилар;
cукук ал-муробаҳада – қарздор ва инвесторлар ўртасида мулкни олди-сотди шартномаси тузилади, унга кўра инвесторлар маълум бир активни мулк сифатида сотиб оладилар, сертификат баҳоси эса мазкур мулкнинг харид баҳосини ташкил этади. Инвесторлар даромади мазкур мулкни тўлов муддатини узайтириб (муробаҳа) қайта сотиш йўли орқали олинади;
сукук ас-салам – сукук ал-муробаҳанинг кўзгудаги акси кабидир. Сукукнинг ушбу шаклида қарздор – товар ишлаб чиқарувчи инвесторларга товарни етказиб бериш муддатини узайтириш орқали сотади, товар баҳоси эса дарҳол тўланиши лозим. Товарни етказиб бериш муддатлари шартномада кўрсатилган бўлиши керак. Инвесторнинг даромади товар харид баҳосидан чегирмалар ҳисобига шаклланади. Олинган товар кейинчалик сотиб юборилиши мумкин;
сукук ал-истисноъ – мумтоз лойиҳавий молиялаштириш ёки пудрат шартномасининг ўхшаши ҳисобланади. Истисноъ шартномасининг шартларига кўра мулк ташкил этилгунига қадар сотилади. Инвесторлар, қоидага кўра, сметага мувофиқ босқичма-босқич тўловни амалга оширади. Товар баҳоси шартнома тузилаётган вақтда томонлар ўртасида келишиб олиниши шарт. Инвесторларнинг даромади сукук ас-салам усули бўйича шакллантирилади.

Юқорида айтиб ўтилганидек, сукук облигацияларга ўхшаб кетсада, анъанавий облигациялардан фарқли равишда эмитент ва облигация эгалари ўртасидаги қарз муносабатларидан бошқача муносабатларни(фақат муробаҳа-сукуклари бундан мустасно) мустаҳкамлайди. Сукук – бу активлар билан таъминланган қимматли қоғозлардир.

Сукук сертификати – инвестицион сертификат бўлиб, активлар саватидаги(таянч актив) мулкий ҳуқуққа киритилган маблағлар миқдорига мутаносиб ёки биргаликда амалга оширилаётган лойиҳадаги, корхонадаги улушга ўз эгасининг улуш ҳуқуқи борлигини тасдиқлайди.