Искусство — %мирим

Шәкиртлер устазы ҳаққында
Театр сахнасында Айымхан Шамуратовадай уллы актрисалар ҳәм актерлар менен ойнағанымыз, олардың шәкирти болғанымыз, кеңеслерин тыңлағанымыз бизлердиң дөретиўшилик жолымызда үлкен әҳмийетли болды. Айымхан апа менен бирқанша спектакльлерде ана-бала болып рольлер атқарғанбыз. Ол қарақалпақтың бүлбили болып, өз дәўиринде Айымхан Шамуратова десе Қарақалпақстан деп таныйтуғын дәрежеге еристи. Ол талантлы актриса, бүлбилзибан қосықшы болыўдан үлкен исти, бир өзи жети перзентти тәрбиялаўдай аналық ҳәм әкелик парыз бенен қоса тең тарта алды. Апамыз ҳадаллықты сүйди, туўры сөйледи, талантлы жасларды қанаты астына алды, қайрыхомлық етти. Оларды изине ертип жүрип, тийисли орынларға барып, айтысып-тартысып жай әпериў, жоқ жерден жәрдемлер шөлкемлестириўдей саўаплы ислердиң басында болды. Бундай ислер ҳәркимниң қолынан келе бермейди. Ол тынып-тыншыўды билмейтуғын еди. Өзиниң өмир жолы, айтқан қосықлары, жазған китаплары келешек әўладларға естелик болып қалды.

Нәжиматдин Аңсатбаев, Өзбекстан ҳәм Қарақалпақстан халық артисти, Бердақ Атындағы мәмлекетлик сазлы театрдың Директоры.

АЙЫМХАН АПАҒА
(Қарақалпақстан халқының хош ҳаўаз бүлбили Айымхан
Шамуратованың 90 жыллық юбелейине бағышланады)

Гүлзар толы гүл болса, оның да сарысы бар, Нешше жүйрик тил болса, оның да данасы бар, Бардур сансыз тулпарлар, оның да дарасы бар, Аналар көп дуньяда, оның да анасы бар, Сиз халқымның дарасы ҳәм анасы болғансыз. Қанлыкөлдиң топырағы сиздей гүлди жаратты, Периште ҳүснин берип илаҳий нур таратты, Хош ҳаўазың сыйқыры думый журтты қаратты, Сан мың дәртли кеўилге бағышладың қанатты, Сиз халқымның шадлығы, нурлы таңы болғансыз. Жети жетим ул-қызға болып пана ҳәм ана, Қостарыңды жоғалтып кеўлиң болмады ғамхана, Сонда ҳәм налыс етпедиң, қыйынлықты арқаға,- Серпип таслап, шығыстың, бәрин жыйып ортаға, Сиз халқымның ер жүрек, дана қызы болғансыз. Тәриплесем сөз жетпес, мийнетиңе өлшеў жоқ, Ҳәм қосықшы, ҳәм актёр тыныш өткен кешиң жоқ, Ана халыққа қалдырған мийрасың көп, исиң көп, Сизди устаз, ана деп пир тутыўшы қызың көп, Сиз халқымның бүлбили, кеўил тары болғансыз. 90 жыллық тойларың ел-халыққа мүбәрек, Сиз жаратқан шоққылар кең далаңа мүбәрек, Сизден мийрас мәртликлер ул-қызларға мүбәрек, Сиз қалдырған бул дәргай ана журтқа мүбәрек, Сиз, бул қарақалпақтың хош ҳаўазы болғансыз.