Ichki yonuv dvigatellarining asosiy parametrlarini tahlil qilish

Nosozliklar va ularni bartaraf qilish. Moy sarfi oshganda, bosimning (kompressiya) kamayishida, ishlatilgan gazlarning tutashi va sapundan tutun chiqsa silindrlar, kompression va moy sidiruvchi xalqalar, hamda porshenlarning holati tekshiriladi. Agar bu detallarning o’lchamlari yaroqsizlik o’lchamlariga yetsa, silindrlar yoki ularning gilzalari katta (ta’mirlash) o’lchamda yuniladi va silliqlanadi, yunishga yaroqsiz bo’lgan silindrlarning gilzalari yangisiga almashtiriladi.

Silindrlar gilzasi va blok-karter oralig’idagi zichlovchi rezina xalqalarning qoniqarsiz holati suv yo’lidan karter tubiga suv o’tishiga olib kelishi mumkin. Bu holatda gilza chiqarib olinadi va yaroqsiz rezina xalqalar yangisiga almashtiriladi. Karter tubidan moy oqishi qistirmalarni tekis va zich mahkamlanmaganligi, ayrim hollarda esa tirsakli valning oldingi va orqa tayanchlaridagi zichlagichlarni yeyilishi sababli ham sodir bo’ladi. Moy oqishi aniqlanganda karter tubini barcha boltlari va tiqin bolti ham mahkamlanadi, agar bu yordam bermasa, shikastlangan qistirmalar yoki yeyilgan zichlovchi detallar almashtiriladi.

Moy quyish bo’g’izidan qistirma va zichlagichlar orqali moyning oqishi sezilarli darajadagi gaz ajralishi bilan kuzatilsa, karterning shamollatish tizimini tozalash lozim. Agar bundan keyin ham moy oqishi to’xtamasa, silindrlar, porshenlar va porshen xalqalari holatini tekshirish zarur, zarur bo’lgan hollarda esa ularni almashtirish lozim.